Партугальская паліцыя паведаміла, што ў нядзелю затрымала бізнесмена з Гвінеі-Бісау і канфіскавала ў яго 5 млн еўра наяўнымі. Аперацыя была праведзена пасля атрымання ананімнага паведамлення.
У заяве паліцыі гаворыцца, што замежнік, які прыбыў з Гвінеі-Бісау, падазраецца ў кантрабандзе і адмыванні грошай.
“Расследаванне, праведзенае судовай паліцыяй цягам ночы і ранняй раніцы, пачалося пасля атрымання ананімнага паведамлення. У багажы падазраванага знаходзілася каля пяці мільёнаў еўра наяўнымі. Першапачаткова рэйс быў класіфікаваны як ваенны і павінен быў следаваць з Лісабона ў Бежу. Пазней высветлілася, што характар палёту і пункт прызначэння адрозніваліся ад тых, якія першапачаткова былі ўказаныя авіяцыйным уладам”, — гаворыцца ў паведамленні паліцыі.
Партугальскія СМІ паведамляюць, што гаворка ідзе пра Ціта Гомеса Фернандэса, бізнесмена, блізкага да зрынутага прэзідэнта Гвінеі-Бісау Умару Сісоку Эмбала. Таксама на борце самалёта знаходзілася жонка гвінейскага прэзідэнта.
Умару Сісоку Эмбала быў зрынуты вайскоўцамі напрыканцы лістапада, праз тры дні пасля прэзідэнцкіх выбараў.
Умару Сісоку Эмбала ў траўні гэтага года прыязджаў у Беларусь. Ён сустракаўся з Аляксандрам Лукашэнкам. Падчас перамоваў прэзідэнту Гвінеі-Бісау прапаноўвалася супрацоўніцтва ў сферы сельскай гаспадаркі і ВПК.
Гвінея-Бісау — невялікая дзяржава ў Заходняй Афрыцы. Яна мяжуе з Сенегалам і Гвінеяй. Па памерах краіна параўнальная з беларускімі абласцямі, а яе насельніцтва — прыкладна такое ж, як у агламерацыі Мінска. Паводле даных МВФ, намінальны ВУП краіны складае 2,1 млрд долараў. Краіна займае 170-е месца ў свеце паводле гэтага паказчыка. Для параўнання, Беларусь знаходзіцца на 86-м месцы.
