Міністэрства замежных спраў Беларусі пракаментавала зробленую днямі заяву кіраўніцы Еўрапейскай камісіі Урсулы фон дэр Ляен пра тое, што адмова ад атамнай энергетыкі была “стратэгічнай памылкай” ЕС, а таксама абмеркаванне ў Літве планаў будаўніцтва ўласнай АЭС.
«Для нас гэта не стала адкрыццём — мы заўсёды зыходзілі з таго, што энергетычная бяспека павінна будавацца на рэальных патрэбах, а не на палітычнай кан’юнктуры», — заявіў прэс-сакратар МЗС Беларусі Руслан Варанкоў у адказ на пытанне тэлеканала АНТ.
Прадстаўнік ведамства прапанаваў Літве і Польшчы купляць электраэнергію, выпрацаваную на Беларускай АЭС у Астраўцы.
“Мы толькі вітаем асэнсаванае стаўленне суседзяў да мірнага атаму. Беларусь прайшла гэты шлях — пад ціскам, пад санкцыямі, пад бясконцай крытыкай. Але мы пабудавалі сучасную, бяспечную станцыю, якая працуе і дае вынік. Спрыяе эканамічнаму развіццю краіны і забяспечвае надзённыя патрэбы грамадзян без сур’ёзных абцяжаранняў.
І, карыстаючыся выпадкам, хачу нагадаць: мы па-ранейшаму гатовы падставіць плячо. Калі Літве або Польшчы патрэбна электрычнасць — надзейная, недарагая, вырабленая літаральна ў двух кроках — нашы дзверы адкрыты. Па-суседску”, — заявіў ён.
