У МУС заявілі, што інфармацыя пра грамадзянку Індыі, якая прыехала ў Беларусь на працу і трапіла ў працоўнае рабства, не адпавядае рэчаіснасці.
Паводле сцвярджэння ведамства, супрацоўнікі Дэпартамента па грамадзянстве і міграцыі ўстанавілі, што ў лістападзе мінулага года 38-гадовая жанчына прыбыла ў Беларусь з мэтай працаўладкавання. Як паведамілі ў МУС, на падставе кантракта з сельскагаспадарчым прадпрыемствам ёй быў выдадзены дазвол на часовае пражыванне ў краіне, а таксама выдзелена «жыллёвае памяшканне ў цагляным доме з усімі выгодамі».
«Літаральна праз восем дзён працоўныя адносіны з наймальнікам былі скасаваныя. Адпаведна, дазвол на часовае пражыванне ануляваны. Вядома, што пасля гэтага жанчына выязджала ў Расію, затым вярнулася ў нашу краіну», — заявілі ў ведамстве.
Паводле слоў жанчыны, пасярэднік у Індыі абяцаў ёй іншую працу, але пасля яе прыезду перастаў выходзіць на сувязь.
«8 лістапада 2025 года я прыехала ў Беларусь. Агент з Індыі прапанаваў мне і расказаў, што ў вашай краіне ёсць добрая праца: можна займацца зборам ураджаю і атрымліваць годную зарплату. За паслугі агенту ў сваёй краіне я заплаціла 500 тысяч рупій (каля 5,5 тысяч долараў).
У Беларусі я трапіла не на тую працу, якую мне абяцалі, і таму захацела вярнуцца дадому, але ў мяне не было грошай на зваротны білет. Я пачала тэлефанаваць свайму агенту ў Індыю, каб ён мне дапамог, але яго тэлефон быў заблакаваны, і я не магла з ім звязацца. Пра сваю праблему я вырашыла напісаць у інтэрнэце, каб на радзіме хтосьці заўважыў гэта і дапамог мне вярнуцца дадому. Цяпер мне аказваюць дапамогу беларускія міліцыянеры, і я вельмі ўдзячная ім за гэта», — кажа яна ў апублікаваным МУС відэа.
Як сцвярджаюць у ведамстве, цяпер жанчыне «аказваецца ўся неабходная дапамога, у тым ліку звязаная з яе вяртаннем дадому».
Органы ўнутраных спраў праводзяць праверку, у ходзе якой маюць намер высветліць абставіны яе знаходжання ў Беларусі.
«Устанаўліваюцца ўсе датычныя асобы, уключаючы наймальнікаў і пасярэднікаў у яе працаўладкаванні, іх дзеянням будзе дадзена прававая ацэнка», — заявілі ў МУС.
«Такім чынам, інфармацыя ў сетцы Інтэрнэт на ўказаную тэму не знайшла пацвярджэння. У сувязі з гэтым нагадваем, што распаўсюджванне недакладных звестак цягне за сабой адказнасць. Беларусь адкрытая для законапаслухмяных гасцей. У той жа час айчынны рынак працы знаходзіцца пад кантролем міліцыі і іншых дзяржаўных органаў. Парушэнні заканадаўства, у тым ліку з боку пасярэднікаў, якія ажыццяўляюць падбор замежнікаў для працаўладкавання, не застануцца без увагі і могуць стаць падставай для прыцягнення вінаватых да адказнасці», — гаворыцца ў прэс-рэлізе.
Нагадаем, напярэдадні выданне Divya Bhaskar апублікавала гісторыю жыхаркі індыйскага штата Гуджарат па імені Міна Джошы. Жанчына сцвярджала, што стала ахвярай махлярства і ў Беларусі не атрымала абяцанай працы і зарплаты. Яна сцвярджала, што яе пасялілі ў кароўніку за 350–400 км ад Мінска. На відэа жанчына казала, што ледзь выжывае і хоча вярнуцца ў Індыю, але ў яе няма грошай.
