МУС аб’явіла пра раскрыццё «шэрай» схемы легалізацыі замежнікаў у Беларусі. Аператыўнікамі ГУБАЗіК пры падтрымцы спецназаўцаў з «Беркуту» ў Мінску затрыманы два замежнікі і грамадзянка Беларусі.
Паводле версіі МУС, яны аказвалі «садзейнічанне мігрантам у незаконным уездзе і знаходжанні» ў краіне.
«Яны выраблялі і падавалі ў дзяржаўныя ўстановы загадзя падробленыя дакументы як ад фіктыўных, так і ад рэальных працадаўцаў. Такім чынам забяспечвалі нелегалам атрыманне віз і дазволаў на часовае пражыванне ў Беларусі», — гаворыцца ў паведамленні.
Паслугі абыходзіліся мігрантам у 200–250 долараў з чалавека. Акрамя таго, яны павінны былі штомесяц плаціць арганізатарам схемы да 250 рублёў.
«Папярэдне ўстаноўлена звыш 100 кліентаў. Многія з іх працавалі тут таксістамі, падсобнымі рабочымі на рынках і прадпрыемствах грамадскага харчавання», — дадалі ў МУС.
Узбуджана крымінальная справа. Цягам вобшукаў па месцах пражывання фігурантаў і ў офісах канфіскаваны электронныя носьбіты, дакументы фінансава-гаспадарчай і іншай дзейнасці.
Замежнікаў, якія скарысталіся паслугамі затрыманых, чакае выдварэнне з Беларусі.
