Міністэрства аховы здароўя Беларусі забараніла ўвоз і абарот шэрагу біялагічна актыўных дабавак да ежы расійскай вытворчасці. Ідзе гаворка пра прадукцыю кампаніі ТАА «Сапплемент Груп» (Расія).
Як паведамілі ў ведамстве, факты продажу БАДаў, што не адпавядаюць патрабаванням бяспекі, былі выяўленыя пры ажыццяўленні дзяржаўнага санітарнага нагляду.
У асобных дабаўках зафіксавана значнае перавышэнне дапушчальных узроўняў утрымання біялагічна актыўных рэчываў, у тым ліку вітаміну D3, вітамінаў групы B, кафеіну, рэсвератролу і іншых кампанентаў. У некаторых выпадках перавышэнне нормы складае дзясяткі і болей разоў.
Пастановай намесніка міністра аховы здароўя — галоўнага дзяржаўнага санітарнага ўрача ад 20 снежня 2025 года №82 уведзена забарона на ўвоз, захоўванне, транспартаванне і выкарыстанне згаданай прадукцыі на тэрыторыі Беларусі.
У Мінздароўі падкрэслілі, што бескантрольны прыём біялагічна актыўных дабавак можа ўяўляць пагрозу для здароўя, і нагадалі пра неабходнасць кансультацыі са спецыялістамі перад іх ужываннем. Інфармацыя пра часовыя санітарныя меры размешчана на афіцыйным сайце Рэспубліканскага цэнтра гігіены, эпідэміялогіі і грамадскага здароўя.
