Авіякампанія Turkish Airlines сапраўды вяртаецца ў Мінск. Гэта пацвердзілі ў прэс-службе аэрапорта беларускай сталіцы.
Рэйсы па маршруце Стамбул – Мінск – Стамбул будуць выконвацца з 21 верасня. Turkish Airlines будзе лётаць шэсць разоў на тыдзень па аўторках, чацвяргах і суботах: чатыры рэйсы будуць начнымі, два – дзённымі.
“РУП “Нацыянальны аэрапорт Мінск” вітае вяртанне турэцкага перавозчыка на беларускі авіяцыйны рынак і рэкамендуе пасажырам сачыць за актуальным раскладам на афіцыйным сайце авіякампаніі”, – гаворыцца ў паведамленні аэрапорта.
Раней СМІ ўжо заўважылі білеты па маршруце Стамбул – Мінск у сістэме браніравання турэцкай авіякампаніі. Час палёту заяўлены ў 3 гадзіны 40 хвілін, што прыкладна на дзве гадзіны менш, чым працягласць аналагічнага рэйса “Белавія”. Верагодна, Turkish Airlines будзе лётаць у Мінск праз тэрыторыю ЕС.
