Дарожная карта развіцця ключавых напрамкаў супрацоўніцтва паміж Беларуссю і Інданезіяй на 2026–2030 гады ўхвалена па выніках перамоў Аляксандра Лукашэнкі і Прабова Субіянта.
Па выніках візіту Лукашэнкі ў Інданезію таксама падпісаныя:
- Мемарандум аб супрацоўніцтве ў сферы прамысловай кааперацыі,
- Мемарандум аб супрацоўніцтве ў галіне культуры,
- Мемарандум аб супрацоўніцтве ў галіне аховы здароўя,
- Пагадненне аб навукова-тэхнічным супрацоўніцтве,
- Мемарандум аб узаемаразуменні паміж Нацыянальным банкам Рэспублікі Беларусь і Упраўленнем фінансавых паслуг Інданезіі,
- Мемарандум аб супрацоўніцтве па абмене інфармацыяй, звязанай з легалізацыяй злачынных даходаў і фінансаваннем тэрарызму, фінансаваннем распаўсюджвання зброі масавага паражэння,
- Мемарандум аб узаемаразуменні ў сферы акрэдытацыі паміж РУП «Беларускі дзяржаўны цэнтр акрэдытацыі» і органам па акрэдытацыі Інданезіі,
- Пагадненне аб супрацоўніцтве Беларускай гандлёва-прамысловай палаты і Гандлёва-прамысловай палаты Інданезіі.
На перамовах з прэзідэнтам Інданезіі Аляксандр Лукашэнка адзначыў, што для беларусаў дастаткова работы ў гэтай краіне.
“Падчас падрыхтоўкі да гэтага візіту і знаходзячыся другі раз у Інданезіі за час сваёй прэзідэнцкай службы, я абсалютна перакананы, што для беларусаў работы ў Інданезіі дастаткова, і мы гатовы сур’ёзна папрацаваць, каб рэалізаваць тыя мэты, якія вы паставілі перад сваім гіганцкім народам і велізарнай краінай”, — сказаў ён.
“Нашы міністры, члены ўрада з інданезійскага і беларускага бакоў учора сустрэліся і абмеркавалі асноўныя пытанні, асноўныя напрамкі нашай работы — Беларусі ў Інданезіі і Інданезіі ў Беларусі. Я абсалютна перакананы, што пра многае ўжо дамовіліся. Таму нам трэба зацвердзіць гэтыя дамоўленасці і без валакіты і бюракратыі дзейнічаць. Толькі наперад”, — дадаў ён.
Лукашэнка таксама прывітаў рашэнне Інданезіі адкрыць пасольства ў Мінску.
«Патэнцыял нашага супрацоўніцтва значны. І справа не ў тым, што вы гіганцкая краіна, а мы ў параўнанні з вамі невялікая дзяржава. Мы валодаем патрэбнымі для вас тэхналогіямі і кампетэнцыямі. І мы ў гэтым плане гатовы з вамі працаваць, у гэтым плане няма закрытых тэм.
Мы нікога не баімся, як і вы ў Інданезіі, таму што мы робім гэта не супраць кагосьці, а робім гэта на карысць нашых краін і народаў. Мы вітаем рашэнне інданезійскага боку аб адкрыцці пасольства ў Мінску. Упэўнены, што дыпламатычная місія будзе плячо ў плячо працаваць з беларускім пасольствам у Джакарце, дапаможа павялічыць інтэнсіўнасць кантактаў паміж нашымі краінамі. Мы акажам усялякую падтрымку таму чалавеку, якога вы накіруеце ў Беларусь, вашаму паслу”, — сказаў ён.
Лукашэнка прапанаваў Інданезіі працаваць з беларускай тэрыторыі на Еўропу.
«Я хачу падкрэсліць, што Беларусь з’яўляецца цэнтральнай дзяржавай у Еўропе. Менавіта ў Беларусі знаходзіцца цэнтр Еўропы. Вы разумееце, паміж Ла-Маншам і Уральскімі гарамі Беларусь — цэнтр. І вы заўсёды можаце на нас разлічваць.
Вы можаце з тэрыторыі Беларусі працаваць у Еўропе, і мы акажам вам у гэтым усялякую падтрымку. Мы з вамі сябры, і ў сувязі з гэтым будзем рабіць усё неабходнае, каб вы калі-небудзь не пашкадавалі, што звязаліся з намі», — сказаў ён.
Лукашэнка таксама адзначыў, што прынцыпы супрацоўніцтва Мінска і Джакарты супадаюць.
«Галоўнымі прынцыпамі супрацоўніцтва для нас з’яўляюцца ўзаемная павага, гатоўнасць аказваць падтрымку адзін аднаму, у тым ліку на міжнароднай арэне. Нягледзячы на геаграфічную аддаленасць, паміж беларусамі і інданезійцамі шмат агульнага.
Вам удаецца паспяхова ўвасабляць у жыццё ваш дэвіз “Адзінства ў разнастайнасці”, высечаны на дзяржаўным гербе краіны. Цудоўна, у гэтым сутнасць і нашай палітыкі. У гэтым адзінстве — сіла вашага народа. Для беларусаў важным гістарычным арыенцірам стаў дэвіз “Разам за моцную і квітнеючую Беларусь!” — сугучна з вашым дэвізам», — сказаў ён.
