Вызвалены ў красавіку беларускі журналіст Анджэй Пачобут заявіў, што збіраецца вярнуцца ў Гродна на пачатку верасня. Пра гэта ён расказаў у інтэрв’ю Ежы Юрэцкаму з польскага выдання Tygodnik Podhalański.
Паводле слоў былога палітычнага зняволенага, цяпер у яго насычаная праграма, а працаваць больш інтэнсіўна яму дапамагае наяўнасць «дэдлайну».
«У мяне ў галаве ёсць дэдлайн. А калі ёсць дэдлайн, то працуеш больш інтэнсіўна. Гэта журналісцкі падыход», — адзначыў ён.
Ён пацвердзіў намер вярнуцца ў Гродна, нягледзячы на асцярогі свайго атачэння.
«Я з Гродна, над Нёманам, і там мая радзіма, Гродзеншчына. Калі паехаў у Вільню і калі быў на Віленшчыне, пачуў нашу польскую мову, тамтэйшую крэсавую… Там уся атмасфера наша, бо гэта фактычна адзін рэгіён. Гэта было вельмі блізка да дому, настальгія вельмі моцная. Як да Друскенікаў прыехалі, Нёман… Так што без сумневу, хачу дадому і паеду дадому, на пачатку верасня гэта будзе. Яшчэ ёсць некалькі спраў — і паеду», — заявіў ён.
Пачобут пагадзіўся, што не ўсе лічаць яго рашэнне правільным. Паводле яго слоў, праводзілася апытанне грамадскай думкі, згодна з якім каля 80% апытаных лічаць, што яму не варта вяртацца ў Беларусь.
Суразмоўца адзначыў, што галоўны аргумент прыхільнікаў гэтай пазіцыі заключаецца ў тым, што па-за межамі Беларусі ён зможа зрабіць больш.
«Тут адрываешся ад часткі супольнасці, якая знаходзіцца ў зусім іншых умовах. І не маеш права гаварыць ад іх імя», — адказаў ён.
Нагадаем, у 2023 годзе беларускага журналіста польскага паходжання Анджэя Пачобута прысудзілі да 8 гадоў калоніі. Яго прызналі вінаватым у распальванні варожасці і закліках да санкцый. У красавіку 2026 года яго вызвалілі ў рамках абмену 5 на 5 і перадалі Польшчы. Пры гэтым журналіст дамогся, каб яму выдалі беларускі пашпарт і паабяцалі, што ён можа вярнуцца ў Беларусь. Пачобут заяўляў, што збіраецца прыехаць у Беларусь да з’езда Саюза палякаў Беларусі, правядзенне якога запланавана на 13 верасня.
