Аляксандр Лукашэнка, вітаючы губернатара расійскай Кіраўскай вобласці Аляксандра Сакалова, пракаментаваў ранішнюю аварыю на цепламагiстралі ў Мінску, з-за якой адбылося зніжэнне тэмпературы ў пяці раёнах беларускай сталіцы.
Паводле слоў Лукашэнкі, ён нават нібыта хацеў тры дні таму папярэдзіць «начальнікаў», каб знізілі тэмпературу цепланосьбіта. Ён лічыць, што ў кватэрах узімку хопіць і 20 градусаў цяпла.
«Надвор’е, як вы толькі што сказалі, для вас не ў навінку. У вас таксама бывае холадна, а будзе яшчэ халадней. Ну добра, мы холаду не баімся. Галоўнае, каб цеплатрасы ў нас вытрымлівалі. Як у нас, так і ў вас. Усялякае бывае. Хаця вось я хварэю цяпер гэтым пытаннем. Кажуць, недзе там пад Мінскам штосьці пад раніцу пачала даваць уцечку цеплатраса: павысілі ціск, цепланосьбіт — ну, як звычайна», — сказаў ён.
«Я падумаў так вось, тры дні таму, думаю, вось трэба папярэдзіць начальнікаў. Думаю, ну, напэўна ж ведаюць, ну дайце вы крыху прахаладней цепланосьбіт, ваду ці яшчэ нешта, але каб яна была пастаянна. Горш будзе, калі ціск павысіце — гарачая гэта цеплатраса. Цяпло такое ў дом, але яго не будзе ўвогуле. Вось цяпер шукаюць там, натуральна, знайшлі, рэзервовыя крыніцы для гэтага.
Але калі б не 100 градусаў ці 90 вада ў трубах была і ціск меншы, а 80, але ціск меншы. Ну, крыху прахаладней было б у пакоі. Не 25, як у нас і ў вас прывыклі, а 20 градусаў дастаткова ў доме. Я не ведаю, як у вас, у мяне так і тут, і дома прахаладна, і гэта выдатна», — працягнуў ён.
У цэлым жа Лукашэнка задаволены тым, якой выдалася ў гэтым годзе зіма, хоць і яна дастаўляе праблемы.
«Ну вось праблемы ў нас па дробязях. Мы, славянскія людзі, умеем гэта рабіць — каб праблемы сабе стварыць, а потым іх гераічна пераадольваць, замест таго каб загадзя падумаць, як забяспечыць цяплом у гэтую марозную зіму.
У нас мы ўжо даўно забыліся пра такую зіму, калі і снег ёсць, і мароз. У вас хапае, а ў нас няма. Таму мы радыя, з аднаго боку, што і снегу было шмат. Людзі паказалі, што ўмеюць снег чысціць, і дзеткам паказалі, што такое сапраўдная зіма. Але, з другога боку, вядома, і праблем дадалося», — сказаў ён.
Лукашэнка таксама выкарыстаў сустрэчу з губернатарам, каб выказацца пра сітуацыю вакол Грэнландыі, Венесуэлы, а таксама ў чарговы раз заклікаць Украіну пайсці на саступкі.
