Аляксандр Лукашэнка хоча, каб Беларусь была не раздзяляльнай лініяй, а мостам паміж Усходам і Захадам. Пра гэта ён заявіў на сустрэчы з губернатарам Кіраўскай вобласці Расіі Аляксандрам Сакаловым. Лукашэнка выкарыстаў сустрэчу для таго, каб пракаментаваць падзеі апошніх дзён, у прыватнасці прэтэнзіі ЗША на Грэнландыю. На яго думку, Еўропа ў гэтай сітуацыі павінна зразумець, што яе будучыня — разам з Расіяй.
«Мы, вядома, не радуемся, што ў Еўропе праблем больш, чым у нас. І што яны нікуды не дзенуцца, каб купляць з Усходу газ. А не толькі з заходняга паўшар’я ў пяць разоў даражэй, чым Расія заўсёды прапаноўвала. Мы не радуемся. Але я, шчыра кажучы, задаволены тым, што, нарэшце, Еўропа зразумела, дзе іх шчасце. Задоўга да ўсялякіх праблем, якія ў іх склаліся, публічна казаў пра тое, што месца Еўропы разам з намі, з Расіяй. Гэта наш дом, тут трэба шукаць шчасце», — сказаў Лукашэнка, перадае яго прэс-служба.
Ён лічыць, што сёння еўрапейская палітыка будзе змяняцца. У гэтым кантэксце ён хацеў бы бачыць Беларусь мостам, які злучае Усход і Захад.
«Не зразумелі. А калі і зразумелі, духу не хапіла і сіл, каб гэта рэалізаваць. Сёння ўжо Барыс Вячаслававіч (Грызлоў, пасол РФ у Мінску — рэд.) Мерц (Фрыдрых, канцлер Германіі — рэд.) заявіў пра тое, што трэба праводзіць уласную палітыку, і калі амерыканцы ўвядуць пошліны, то яны гатовыя адказаць ім большымі пошлінамі.
Магчыма, Еўропа, нарэшце, зразумела, што ёй трэба быць суб’ектам міжнародных адносін. Магчыма. Дай бог. Я не хачу, каб была канфрантацыя з амерыканцамі. Але Еўрапейскі саюз — гэта магутнае аб’яднанне, тэхналагічнае. Ну будзьце ж вы годныя таго, каб называцца Еўрапейскім саюзам, тут жа разумныя людзі жывуць. 700, здаецца, мільёнаў чалавек. Вялізная колькасць людзей. Давайце супрацоўнічаць, што мы коса глядзім адзін на аднаго — ну гэта, каб міністр замежных спраў зразумеў, у чым сэнс нашай палітыкі.
Мы хочам быць не нейкай раздзяляльнай лініяй, мы хочам быць мостам паміж Усходам і Захадам, як заўсёды гэта было. Толькі нас дзяліць не трэба. Нас ужо цяжка падзяліць. У абарончым плане мы з Расіяй тут як адзінае цэлае, і глядзець на нас асобна — на Беларусь, асобна на Расію — няма ніякага сэнсу. Камусьці хочацца, магчыма, але так не будзе. Мы гатовыя абараняць свае інтарэсы. А Гасподзь нам заўсёды дапаможа», — працягнуў Лукашэнка.
Ён таксама даў ацэнку дзеянням Дональда Трампа.
«Глядзіце, ён адкрыта кажа: “Нам патрэбна Венесуэла, бо там ёсць нафта. Нам патрэбна Грэнландыя, бо для абароны важна і рэдказямельныя металы, нафта, газ — усё там ёсць”. Ён адкрыта пра гэта кажа. Чаго дыпламаты не прымаюць. Ды і я. Ты ўжо памаўчы, што там нафта, кажы, што там наркабароны, змагайся супраць іх. А ён адкрыта кажа: яму патрэбна нафта. “І калі вы, еўрапейцы, наша не будзеце купляць, то вам канец, мы вас усіх пераб’ём і гэтак далей і таму падобнае”. У адкрытую», — сказаў Лукашэнка.
