16 снежня літоўская паліцыя правяла маштабную аперацыю, у выніку якой быў затрыманы 21 чалавек. Затрыманыя падазраюцца ў кантрабандзе з выкарыстаннем метэазондаў, а таксама ў аказанні садзейнічання іншай дзяржаве ў дзеяннях супраць Літвы, паведамляе паліцыя Літвы.
У рэйдзе прынялі ўдзел больш за 140 супрацоўнікаў, у тым ліку байцы антытэрарыстычнага падраздзялення Aras. Дасудовае расследаванне кантралюецца Дэпартаментам па расследаванні арганізаванай злачыннасці і карупцыі Генеральнай пракуратуры.
Падчас аперацыі было праведзена больш за 80 вобшукаў. Канфіскаваны цыгарэты з беларускімі акцызнымі маркамі, SIM-карты, блакатары сродкаў сувязі, агнястрэльная зброя. Таксама канфіскавана і арыштавана маёмасць затрыманых, у тым ліку аўтамабілі, на агульную суму каля 720 тысяч еўра.
Як заяўляе літоўская паліцыя, затрыманыя члены арганізаванай групы сістэматычна займаліся кантрабандай цыгарэт. У групе існаваў выразны падзел роляў і строгая канспірацыя. Мяркуецца, што арганізатары наўпрост падтрымлівалі сувязь з саўдзельнікамі на тэрыторыі Беларусі, адкуль запускаліся метэазонды. Рух шароў адсочваўся па GPS, дакладныя каардынаты перадаваліся выканаўцам на тэрыторыі Літвы. Пасля прызямлення шароў груз збіралі і перавозілі ў загадзя ўзгодненыя пункты або перадавалі іншым членам групы.
Усім затрыманым прад’яўленыя падазрэнні ва ўдзеле ў дзейнасці злачыннай супольнасці, незаконным абарачэнні з падакцызнымі таварамі і кантрабандзе гэтых тавараў, а таксама ў аказанні дапамогі іншай дзяржаве ў дзеяннях супраць Літоўскай Рэспублікі.
