Лідары краін Еўрасаюза па выніках саміту 19 сакавіка ў чарговы раз асудзілі падтрымку, якую аказвае Расіі Беларусь у вайне супраць Украіны, і заклікалі яе спыніць. Адпаведны пункт змяшчаецца ў высновах саміту ЕС па Украіне, якія былі падтрыманы 25 з 27 краін-членаў саюза.
“Еўрапейскі савет настойліва заклікае ўсе краіны неадкладна спыніць любую дапамогу Расіі ў яе агрэсіўнай вайне супраць Украіны, як прамую, так і ўскосную, і, у прыватнасці, шляхам прадастаўлення тавараў і кампанентаў двайнога прызначэння. У прыватнасці, ён рашуча асуджае разгортванне ўзброеных сіл КНДР у вайне супраць Украіны, а таксама працяглую ваенную падтрымку, якую аказваюць Іран, Беларусь і КНДР, сярод іншых”, — гаворыцца ў дакуменце.
У высновах таксама пацвярджаецца падтрымка Украіны. Дэкларуецца, што будучыня Украіны і яе грамадзян ляжыць у Еўрапейскім саюзе, вітаецца прагрэс, дасягнуты Кіевам на шляху ў ЕС.
Дзяржавы ЕС будуць працягваць актыўна ўдзельнічаць у мірных намаганнях.
“Шлях да міру ва Украіне не можа быць вызначаны без Украіны. Еўрапейскі саюз будзе прымаць рашэнні па пытаннях сваёй кампетэнцыі або тых, што закранаюць яго бяспеку”, — гаворыцца ў дакуменце.
Таксама ЕС гатовы ўнесці ўклад у забеспячэнне гарантый бяспекі для Украіны.
У дакуменце гаворыцца, што Еўрасавет чакае першы плацеж Украіне з крэдыту ў 90 млрд еўра на 2026–2027 гады да пачатку красавіка. Ён таксама заклікае да актывізацыі ўзаемадзеяння з трэцімі краінамі для аказання дапамогі ў скарачэнні астатняга дэфіцыту ў 30 млрд еўра ў фінансах Украіны. Трэба адзначыць, што канчатковае рашэнне аб выдзяленні 90 млрд еўра ўсё яшчэ блакуецца Венгрыяй, так жа, як і прыняцце 20-га пакета санкцый.
“Еўрапейскі саюз па-ранейшаму поўны рашучасці яшчэ больш узмацніць ціск на Расію і працягваць аслабляць ваенную эканоміку Расіі, каб яна спыніла сваю жорсткую агрэсіўную вайну і пачала канструктыўныя перамовы пра мір. Еўрапейскі савет разлічвае на найхутчэйшае прыняцце 20-га пакета санкцый”, — гаворыцца ў дакуменце.
