Кітай пачаў буйныя вучэнні каля Тайваня. Іх праводзіць Усходняе камандаванне кітайскай арміі.
Манёўры атрымалі назву «Місія справядлівасці-2025». Да іх прыцягнутыя сухапутныя войскі, ваенна-марскі флот, ВПС і ракетныя войскі. Яны праводзяцца ў Тайваньскім праліве, а таксама на поўначы, паўднёвым захадзе, паўднёвым усходзе і ўсходзе ад Тайваня.
Як паведаміў прадстаўнік Усходняга камандавання НВАК, адпрацоўваюцца патруляванне на моры і ў паветры, блакаванне ключавых партоў і раёнаў, а таксама меры стрымлівання.
«Караблі і самалёты набліжаліся да Тайваня з розных напрамкаў, а розныя роды войскаў наносілі сумесныя ўдары. Мэта вучэнняў заключалася ў праверцы сумесных баявых магчымасцяў войскаў камандавання тэатра ваенных дзеянняў. Гэта сур’ёзнае папярэджанне сепаратысцкім сілам, якія выступаюць за “незалежнасць Тайваня”, і сілам знешняга ўмяшання, а таксама законны і неабходны крок для абароны нацыянальнага суверэнітэту і падтрымання нацыянальнага адзінства», — гаворыцца ў заяве.
Гэта ўжо шостыя буйныя манёўры паблізу Тайваня з 2022 года. Гэтым разам яны пачаліся праз 11 дзён пасля абвяшчэння ЗША аб продажы Тайваню найбуйнейшага за ўвесь час пакета ўзбраенняў.
