Старшыня Камітэта дзяржаўнага кантролю Васіль Герасімаў лічыць ключавой задачай сваёй арганізацыі праверку выканання даручэнняў Аляксандра Лукашэнкі.
“Наша агульная мэта — дамагчыся своечасовага і якаснага выканання пастаўленых кіраўніком дзяржавы задач. Кожны выканаўца павінен адчуваць асабістую адказнасць за канчатковы вынік перад прэзідэнтам”, — заявіў Герасімаў, выступаючы перад абедзвюма палатамі Нацыянальнага сходу.
Паводле яго слоў, назіраецца паляпшэнне выканаўчай дысцыпліны пры выкананні даручэнняў Лукашэнкі. Герасімаў адзначыў, што ўзмоцнены кантроль устаноўлены літаральна за кожным даручэннем. Гэта ўключае і меры персанальнай адказнасці кіраўнікоў.
Старшыня КДК таксама прывёў даныя вынікаў кантролю аграпрамысловага комплексу. Паводле вынікаў кантрольных мерапрыемстваў унесена звыш 3 тыс. актаў нагляду, за парушэнні да адказнасці прыцягнута больш за 9 тыс. асоб, уключаючы 26 старшынь райвыканкамаў. Прыняты меры па спагнанні з вінаватых шкоды ад падзяжу жывёлы ў памеры больш за 3,8 млн рублёў.
Камітэт працягвае кантраляваць будаўніцтва і запаўненне малочнатаварных комплексаў. На пачатак 2026 года каля 12,5 тыс. скотамесцаў на 53 сучасных фермах не былі запоўненыя.
“Яркім прыкладам з’яўляецца нядаўняя крымінальная справа ў Слуцкім раёне, звязаная з выкарыстаннем падрадчыкам на асабістыя патрэбы выдзеленых на будаўніцтва ферм больш за 3 млн рублёў”, — прывёў прыклад Васіль Герасімаў.
У трэці правераных гаспадарак зафіксаваны тэхналагічныя парушэнні, якія прывялі да недаатрымання значных аб’ёмаў прадукцыі раслінаводства.
Таксама Герасімаў адзначыў, што ў палове правераных гаспадарак частка меліяраваных зямель выкарыстоўваецца неэфектыўна.
За грубыя парушэнні заканадаўства паводле вынікаў праверак у 2025 годзе з Рэестра перапрацоўшчыкаў мясной прадукцыі выключаны 41 суб’ект. Прыпынена дзейнасць яшчэ 27.
«Да нядобрасумленных перапрацоўшчыкаў прымяняюцца розныя меры ўздзеяння. Галоўная мэта — гандляваць не сыравінай, а прадукцыяй з глыбокай ступенню перапрацоўкі і высокай дабаўленай вартасцю», — падкрэсліў Герасімаў.
Выяўлены парушэнні і ў лясной галіне.
“Па ўсёй рэспубліцы ўтварыўся рэкордны запас незапатрабаванай драўніны — каля 6 млн куб. м. Па-ранейшаму фіксуецца псаванне лесаматэрыялаў. Толькі па выяўленых фактах прыйшло ў непрыдатнасць больш за 32 тыс. куб. м нарыхтаванай драўніны. Нямала пытанняў і да ўліку нарыхтаванай драўніны. Толькі пасля ўмяшання КДК больш за 58 тыс. куб. м драўніны, якая раней не значылася ў справаздачнасці, былі прынятыя да ўліку”, — адзначыў кіраўнік КДК.