Былога памочніка Аляксандра Лукашэнкі па Віцебскай вобласці Ігара Брыло прысудзілі да 12 гадоў пазбаўлення волі па справе, звязанай з малочным холдынгам «Бабуліна крынка». Прысуды па «малочнай справе» сталі вядомыя «Нашай Ніве».
Такі тэрмін для Брыло раней запытваў бок абвінавачання. Паводле інфармацыі выдання, былы генеральны дырэктар «Бабулінай крынкі» Генадзь Скітаў атрымаў 15 гадоў пазбаўлення волі. Паведамляецца, што Брыло актыўна супрацоўнічаў са следствам, а Скітаў адмовіўся даваць паказанні. У сувязі з гэтым працэс расследавання моцна зацягнуўся.
Крымінальная справа пачалася з затрыманняў у лістападзе 2023 года. Тады былі арыштаваныя Брыло, Скітаў, а таксама шэраг кіраўнікоў і супрацоўнікаў прадпрыемстваў, якія ўваходзілі ў структуру малочнага холдынга.
Паводле версіі абвінавачання, фігуранты арганізавалі схему, пры якой на складах прадпрыемства штучна ствараліся лішкі прадукцыі. Затым малочная прадукцыя прадавалася афіляваным пасярэднікам па заніжаных цэнах, пасля чаго перапрадавалася ў Расіі па рынкавай вартасці. Атрыманую розніцу, як сцвярджалася, удзельнікі схемы размяркоўвалі паміж сабой.
Судовы працэс пачаўся ў верасні 2025 года і завяршыўся некалькі месяцаў таму. Акрамя Брыло і Скітава, па справе праходзілі яшчэ 15 чалавек. Звесткі пра іх прысуды не публікуюцца.
Акрамя цэнтральных фігурантаў, пад суд, паводле інфармацыі выдання, таксама трапілі:
- Віктар Скітаў, сын Генадзя Скітава, дырэктар філіяла «Мінскі» «Бабулінай крынкі».
- Арцём Зубель, першы намеснік дырэктара «Бабулінай крынкі», сын былога намесніка начальніка Шчучынскай міліцыі.
- Галіна Ціцянкова, намесніца дырэктара «Бабулінай крынкі», якая пазней узначаліла гаспадарку «Новая Друць» у Бялыніцкім раёне.
- Аляксей Драніца, начальнік аддзела знешнеэканамічнай дзейнасці «Бабулінай крынкі».
- Дзяніс Ліннік, дырэктар філіяла «Асіповіцкі» «Бабулінай крынкі», былы начальнік Барысаўскага РУУС.
- Сяргей Петражыцкі, дырэктар «Віцебскмясамалпрама».
- Уладзімір Сіруць, «галоўны сябар» Генадзя Скітава, кіраўнік шэрагу афіляваных кампаній.
- Сяргей Качанаў, дырэктар віцебскага канцэрна «Мяса-малочныя прадукты».
- «М. В. Мікалаевіч». — поўны цёзка Міхаіла Валянцінавіча Мікалаевіча, былога намесніка старшыні праўлення «Тэхнабанка» і намесніка дырэктара салігорскага футбольнага «Шахцёра».
- Уладзімір Лісіцын, заснавальнік «БелАграГен Беларусь».
Яшчэ пра пяць асоб дакладна невядома, чым яны займаліся на волі: А. Чарняк, А. Яшчанка, Г. Кіракасян, А. Сабалькоў, А. Панкоў.
Фігурантам былі прад’яўлены абвінавачанні па шэрагу карупцыйных і эканамічных артыкулаў Крымінальнага кодэкса Беларусі. Абвінавачанні па справе ахоплівалі 12 артыкулаў — ад атрымання і дачы хабару да перавышэння ўлады, злоўжывання ўладай, махлярства і пасярэдніцтва ў хабарніцтве.
