Прэзідэнт ЗША Дональд Трамп заявіў, што Уладзімір Пуцін гатовы да заключэння здзелкі для спынення вайны ва Украіне. Адказваючы на пытанне журналіста Fox News, ён дапусціў, што расійска-ўкраінская вайна можа скончыцца да канца яго прэзідэнцкага тэрміну ў 2029 годзе.
«Думаю, што так. Я думаў, што яна скончыцца яшчэ да пачатку. Гэта было б прасцей за ўсё, бо мы ладзім з абодвума лідарамі. Я думаў, што гэта было б прасцей за ўсё для мяне», — сказаў ён.
Трамп расказаў, што рэгулярна кажа Уладзіміру Пуціну «адно і тое ж».
«Я яму пастаянна кажу адно і тое ж. Не хачу ўдавацца ў падрабязнасці, але я кажу: Уладзімір, табе пара спыніцца, пара пакласці канец гэтай вайне», — перадаў ён змест сваіх размоў з расійскім лідарам.
На пытанне пра тое, што адказвае Пуцін, Трамп сказаў: «Я думаю, ён гатовы да здзелкі. Для танга патрэбныя двое, але я думаю, ён гатовы да здзелкі».
