Іран прапануе Беларусі выкарыстоўваць свае паўднёвыя парты для гандлю з Індыяй, краінамі Афрыкі і Паўднёва-Усходняй Азіі. Пра гэта заявіў міністр прамысловасці, горназдабыўной прамысловасці і гандлю Ірана Мохамад Атабак, выступаючы на 18-м пасяджэнні змешанай беларуска-іранскай міжурадавай камісіі, пішa Tehran Times.
На пасяджэнні таксама абмяркоўвалі супрацоўніцтва ў эканамічнай, камерцыйнай, навуковай, культурнай і інвестыцыйнай сферах. Атабак заявіў пра неабходнасць вырашэння праблем у банкаўскай сферы і пытанняў транзіту для кіроўцаў, каб забяспечыць прадказальную і эфектыўную гандлёвую дзейнасць.
Кіраўнік беларускай дэлегацыі, міністр прамысловасці Андрэй Кузняцоў заявіў, што Беларусь гатова пашыраць супрацоўніцтва з Іранам у сферы эканамічных і прамысловых тэхналогій, фармацэўтыкі, медыцынскага абсталявання, машынабудавання, бытавой тэхнікі, харчовых прадуктаў і сельскагаспадарчых тавараў.
Сярод прыярытэтаў узаемадзеяння ў бліжэйшай перспектыве Кузняцоў назваў транспарт, транзітныя калідоры, навуковую адукацыю і культурны турызм.
Міністэрства прамысловасці Беларусі і Міністэрства сельскай гаспадаркі Ірана таксама дасягнулі пагаднення аб сумеснай вытворчасці сельскагаспадарчай тэхнікі і калійных угнаенняў, паведамляе IRNA.
Бакі дамовіліся, што Іран будзе пастаўляць у Беларусь прадукты і імпартаваць з Беларусі сельскагаспадарчыя сыравінныя матэрыялы. Тэгеран выказаў гатоўнасць забяспечыць транзіт беларускай сельскагаспадарчай прадукцыі ў трэція краіны.
Таксама дасягнута дамоўленасць аб пастаўках беларускага калію, які будзе часткова перапрацоўвацца ў Іране.
