Каардынацыйная рада Беларусі па выніках галасавання прыняла рашэнні аб стварэнні Міжнароднай камісіі, Камісіі па рэформах і падрыхтоўцы пераходнага перыяду і Камісіі па этыцы.
За стварэнне Міжнароднай камісіі прагаласавалі 68 дэлегатаў, супраць — ніводнага, устрымаліся трое. У галасаванні прыняў удзел 71 з 80 членаў КР. Кіраўніка камісіі плануецца абраць у другім туры.
У першым туры выбараў старшыні Міжнароднай камісіі ніводная з трох кандыдатак не набрала неабходнай большасці. У наступны этап прайшлі Маргарыта Ворыхава («Наступ») і Ксенія Луцкіна («Еўрапейскі выбар»). Па выніках першага тура Ворыхава атрымала 36 галасоў, Луцкіна — 28, Аляксандра Мамаева — 1. Сем удзельнікаў галасавання ўстрымаліся або выступілі супраць усіх кандыдатаў. Кворум склаў 72 чалавекі з 80.
Таксама КР зацвердзіла стварэнне Камісіі па рэформах і падрыхтоўцы пераходнага перыяду. Рашэнне падтрымалі 70 дэлегатаў, трое ўстрымаліся.
Старшынёй камісіі абраны Юрый Губарэвіч з кааліцыі «Латушка і рух «За Свабоду», які атрымаў 54 галасы. Намеснікам старшыні стаў Аляксандр Ракіцкі з ініцыятывы «Хопіць баяцца!», які набраў 46 галасоў.
Стварэнне Камісіі па этыцы падтрымалі 70 членаў КР, двое ўстрымаліся. Раней Алесь Міхалевіч прадставіў склад камісіі, якая павінна сачыць за выкананнем этычнага кодэкса Каардынацыйнай рады і зніжэннем узроўню мовы варожасці ў яе працы. У склад камісіі, акрамя Міхалевіча, які будзе займаць пасаду старшыні, увайшлі Аляксандра Дойніч, Міхаіл Рубін, Сяргей Стальмакоў, Дзмітрый Шчыгельскі, Алесь Юркойць, Мікалай Казлоў і Ксенія Луцкіна.
Рашэнні былі прынятыя пасля адкрытага пасяджэння Каардынацыйнай рады 28 ліпеня, на якім кандыдаты прадставілі свае праграмы.
