МУС уключыла ў «Пералік грамадзян Рэспублікі Беларусь, замежных грамадзян або асоб без грамадзянства, датычных да экстрэмісцкай дзейнасці», яшчэ 5 чалавек.
Сярод іх — 50-гадовы палітвязень Аляксандр Баранаў з вёскі Пеніца Калінкавіцкага раёна Гомельскай вобласці. Паводле даных праваабарончага цэнтра «Вясна», у студзені мінулага года ён быў затрыманы па «справе Гаюна». У пераліку пазначана, што ён “адбывае пакаранне”.
«Беларускі Гаюн» — маніторынгавы OSINT-праект, які адсочвае ваенную актыўнасць расійскіх і беларускіх войскаў. Маніторынгавая група была створана перад пачаткам расійска-ўкраінскай вайны актывістам Антонам Матолькам. У пачатку лютага 2025 года сілавікі атрымалі доступ да чата з ботам праекта. Пасля гэтага праект абвясціў аб спыненні працы.
Цяпер у «экстрэмісцкім» спісе 6811 прозвішчаў.
Беларускія ўлады рэгулярна выкарыстоўваюць абвінавачанні ў экстрэмізме для барацьбы з палітычнымі апанентамі і іншадумствам у цэлым.
