Старшыня Нацбанка Беларусі Раман Галоўчанка канстатаваў астуджэнне попыту на крэдыты ў краіне. Гэтым ён патлумачыў зніжэнне разліковых велічынь стандартнай рызыкі на сакавік. Паводле яго слоў, так рэгулятар падае сігнал банкам, што яны рухаюцца ў правільным напрамку.
“Па-простаму кажучы, грошай дастаткова. Мы бачым невялікае астуджэнне попыту на крэдытныя прадукты. Адпаведна, стаўкі крыху пайшлі ўніз, і мы бачым адэкватныя паводзіны банкаў на рынку, яны правільна рэагуюць на эканамічную сітуацыю, якая складаецца. І праз РВСР даём ім зразумець, што яны рухаюцца ў правільным напрамку, і Нацыянальны банк падтрымлівае такую дынаміку сітуацыі на крэдытным і дэпазітным рынку.
Гэта такі намёк банкаўскай сістэме, што вы рухаецеся ў правільным напрамку, але мы ўважліва сочым за тым, што адбываецца. Але ў той жа час мы даём дадатковы сігнал, што трэба павялічваць інвестыцыйнае фінансаванне, праз усталяванне прэферэнцыяльных разліковых велічынь стандартнай рызыкі для крэдытаў, накіраваных на інвестыцыйныя мэты”, – сказаў ён.
Галоўчанка назваў разліковыя велічыні стандартнай рызыкі інструментам “тонкай наладкі ў банкаўскай сістэме”. Паводле яго слоў, яны з’яўляюцца мэтавым арыенцірам для рынку. Пры гэтым банкі маюць права ўсталёўваць стаўкі вышэй даведзеных РВСР.
“Яны могуць гэта рабіць, проста ў дадзеным выпадку павялічваюцца патрабаванні да іх рэзерваў, і гэтыя крэдыты становяцца менш выгаднымі для банкаў. Тым не менш пры пэўных абставінах яны могуць выдаваць іх і па стаўках вышэй РВСР”, – сказаў ён.
Трэба адзначыць, што Раман Галоўчанка ставіць мэту для банкаўскай сістэмы павялічыць інвестыцыйнае крэдытаванне у гэтым годзе не менш чым на 13%.