Еўрапейскі гуманітарны ўніверсітэт (ЕГУ), які працуе ў Вільні, абвясціў аб пашырэнні мер падтрымкі студэнтаў, выкладчыкаў і іх сем’яў пасля таго, як беларускія ўлады прызналі ўніверсітэт «экстрэмісцкім фарміраваннем». Пра гэта гаворыцца ў заяве ВНУ.
Ва ўніверсітэце паведамілі, што ім вядома пра выпадкі ператрусаў, допытаў і іншых дзеянняў у дачыненні да людзей, звязаных з ЕГУ. Паводле ацэнкі адміністрацыі ВНУ, ціск закранае не толькі студэнтаў і супрацоўнікаў, але і членаў іх сем’яў, якія сутыкаюцца з усё большай нявызначанасцю праз сваю сувязь з універсітэтам.
У адказ ЕГУ актывізаваў узаемадзеянне з дзяржаўнымі ўстановамі Літвы, міжнароднымі партнёрамі, дыпламатычнымі прадстаўніцтвамі і арганізацыямі грамадзянскай супольнасці. Мэта гэтых кантактаў — забяспечыць бяспеку членаў універсітэцкай супольнасці і стварыць умовы для працягу навучання і прафесійнай дзейнасці.
Рэктар ЕГУ доктар Вілюс Шадаўскас заявіў, што дабрабыт і бяспека студэнтаў, выкладчыкаў, супрацоўнікаў і іх сем’яў застаюцца безумоўным прыярытэтам універсітэта. Паводле яго слоў, задача адміністрацыі складаецца не толькі ў рэагаванні на цяперашнія выклікі, але і ў забеспячэнні доступу да неабходных рэсурсаў і магчымасцей для працягу акадэмічнай і прафесійнай дзейнасці.
Як адзначаецца ў заяве, сістэма рэагавання ўніверсітэта будуецца па трох асноўных кірунках: забеспячэнне бесперапыннасці адукацыйнага працэсу, аказанне практычнай дапамогі пацярпелым членам супольнасці і ўмацаванне доўгатэрміновай устойлівасці і бяспекі ЕГУ.
За апошнія тыдні ўніверсітэт спрасціў адміністрацыйныя працэдуры, звязаныя з навучаннем, падрыхтаваў магчымасці для размяшчэння студэнтаў, якім можа спатрэбіцца пераезд, а таксама стварыў дадатковыя механізмы кансультавання. Акрамя таго, ЕГУ вядзе працу з літоўскімі дзяржаўнымі структурамі і дыпламатычнымі прадстаўніцтвамі па пытаннях віз, відаў на жыхарства і іншых прававых механізмаў падтрымкі, уключаючы дапамогу тым, каму можа спатрэбіцца выезд з Беларусі.
У ВНУ таксама паведамілі аб пашырэнні доступу да юрыдычнай дапамогі з прыцягненнем незалежных экспертаў у галіне правоў чалавека. Дадаткова былі ўзмоцнены паслугі псіхалагічнай падтрымкі і створана спецыяльная гарачая лінія па прынцыпе «аднаго акна». Прадстаўнікі ўніверсітэта працягваюць кансультацыі са студэнтамі, выкладчыкамі, кіраўнікамі праграм, дзяржаўнымі структурамі і няўрадавымі арганізацыямі для ацэнкі патрэб і карэкціроўкі мер падтрымкі.
Асобную ўвагу ўніверсітэт надае пытанням лічбавай бяспекі. ЕГУ паведаміў аб узмацненні мер кібербяспекі і абароны даных, а таксама аб працягу супрацоўніцтва з інстытуцыйнымі партнёрамі для падтрымання высокіх стандартаў інфармацыйнай бяспекі.
Студэнтам і супрацоўнікам прадастаўляюцца рэкамендацыі па асабістай і лічбавай бяспецы.
У завяршэнне рэктар падкрэсліў, што ўніверсітэт захоўвае прыхільнасць акадэмічнай свабодзе, якаснай адукацыі і навуковым даследаванням. Паводле яго слоў, нягледзячы на знешні ціск, ЕГУ працягвае выконваць сваю місію пры падтрымцы міжнародных партнёраў, літоўскіх уладаў і акадэмічнай супольнасці.
Нагадаем, Вярхоўны суд Беларусі прызнаў дзейны ў Вільні ЕГУ разам з яго структурнымі падраздзяленнямі «экстрэмісцкай арганізацыяй».
У Генпракуратуры лічаць, што ўніверсітэт рыхтуе беларускую моладзь «да рэалізацыі заходніх сцэнарыяў трансфармацыі палітычнай сістэмы, прасоўвання так званых дэмакратычных каштоўнасцей, «альтэрнатыўных» трактоўкаў гістарычных, культурных і іншых падзей».
