Аналітыкі Еўразійскага банка развіцця чакаюць паляпшэння дынамікі ВУП Беларусі. Перадумовы для гэтага стварае захаванне спажывецкага попыту, а таксама чаканае аднаўленне ў будаўніцтве.
На мінулым тыдні Белстат паведаміў пра скарачэнне беларускага ВУП на 1,2% па выніках студзеня-лютага. У студзені аб’ём ВУП таксама быў на 1,2% ніжэй за леташнія паказчыкі.
У ЕАБР назвалі асноўнай прычынай скарачэння ВУП запаволенне прамысловасці на фоне аслаблення знешняга попыту.
“Дадатковы ціск аказалі неспрыяльныя надворныя ўмовы, якія прывялі да скарачэння будаўнічай актыўнасці і інвестыцый (–7,1% г/г). Пры гэтым падтрымку эканоміцы аказвае сельская гаспадарка (+2,8% г/г), а таксама рост спажывання: рознічны тавараабарот павялічыўся на 1,2% г/г на фоне павышэння даходаў насельніцтва (+7,5% г/г за студзень 2026 г.)”, — гаворыцца ў штотыднёвым аглядзе эканомік краін — удзельніц ЕАБР.
“Чаканае аднаўленне будаўніцтва і захаванне спажывецкага попыту ствараюць перадумовы для паляпшэння дынамікі ВУП”, — падсумавалі ў Еўразійскім банку развіцця.
