Краіны Еўрасаюза афіцыйна ўхвалілі адкрыццё першага перамоўнага кластара аб уступленні Украіны і Малдовы ў ЕС, заявіла кіраўніца Еўракамісіі Урсула фон дэр Ляен.
«Гэта прызнанне рашучасці, мужнасці і велізарнай працы, праведзенай абедзвюма краінамі ў прасоўванні рэформаў нават перад абліччам найсур’ёзнейшых выклікаў. Гэта таксама сігнал аб тым, што прапанова Еўрапейскага саюза, заснаваная на міры, стабільнасці і магчымасцях, не мае аналагаў. Пашырэнне — гэта стратэгічны выбар», — заявіла кіраўніца Еўракамісіі.
Кластар па фундаментальных пытаннях будзе адкрыты на першай Міжурадавай канферэнцыі ў панядзелак, 15 чэрвеня.
Прэзідэнт Украіны Уладзімір Зяленскі вітаў рашэнне Еўрасаюза і назваў яго моцным крокам.
«Украіна абараняе сябе і тым самым усю Еўропу — ідэю пра тое, што еўрапейскія народы могуць жыць аб’яднана, свабодна і ў міры. Як мы і казалі, Украіна выконвае ўсё неабходнае, і важна, што Еўрапейскі саюз таксама трымае сваё слова. Адкрыццё першага перамоўнага кластара з’яўляецца значнай палітычнай і маральнай падтрымкай для нашай дзяржавы і нашых грамадзян», — заявіў ён.
