Святлана Ціханоўская выступіла на парламенцкіх слуханнях у Канадзе, прысвечаных сітуацыі з правамі чалавека.
«Беларусь — яркі прыклад таго, што адбываецца, калі грэбуюць дэмакратыяй. Гэта паказвае, як узаемазвязаныя бяспека і дэмакратыя. Улады, якія не паважаюць уласны народ, не будуць паважаць і сваіх суседзяў», – заявіла яна.
Як паведамілі ў Офісе Ціханоўскай, яна расказала пра масавыя рэпрэсіі, ператварэнне Беларусі ў плацдарм для расійскай агрэсіі. Ціханоўская падкрэсліла, што нягледзячы на вызваленне асобных палітвязняў, рэпрэсіі ў краіне не спыніліся.
Ціханоўская звярнулася да ўрада і парламента Канады з прапановамі:
- працягваць ціск на рэжым: захоўваць жорсткую пазіцыю і дабівацца вызвалення ўсіх палітвязняў і спынення рэпрэсій;
- працягваць і павялічваць падтрымку беларускай грамадзянскай супольнасці, дэмакратычных сіл, культурных ініцыятыў і незалежных СМІ; Канада таксама можа падтрымаць Міжнародны гуманітарны фонд;
- падтрымаць намаганні па прыцягненні рэжыму да адказнасці — не толькі за рэпрэсіі, але і за саўдзел у вайне Расіі і дэпартацыю ўкраінскіх дзяцей у Беларусь;
- дапамагчы беларусам у Канадзе: стварыць спрошчаныя механізмы легалізацыі і забараніць экстрадыцыю ў Беларусь;
- дапамагчы ўзняць пытанне аб транснацыянальных рэпрэсіях у ААН і АБСЕ, каб дыктатары не злоўжывалі міжнароднымі механізмамі (уключаючы Інтэрпол) для палітычных пераследаў;
- умацоўваць адносіны з беларускімі дэмакратычнымі сіламі і Аб’яднаным пераходным кабінетам.
🔥 Падтрымайце Reform.news данатам!
