Беларускі МЗС прапаноўваў літоўскаму Міністэрству замежных спраў правесці кансультацыі на палях міністэрскай сустрэчы АБСЕ. Пра гэта заявіў намеснік міністра замежных спраў нашай краіны Ігар Секрэта.
“Я прымаў на мінулым тыдні ўдзел у штогадовай міністэрскай сустрэчы ў АБСЕ 4–5 снежня ў Вене. Мы настойліва прапаноўвалі нашым літоўскім партнёрам скарыстацца гэтай магчымасцю, таму што дэлегацыя Літвы таксама была прадстаўлена на ўзроўні намесніка міністра замежных спраў, і правесці кансультацыі”, — цытуе яго ТАСС.
Трэба адзначыць, што Беларусь настойліва прапануе Літве правесці палітычныя кансультацыі на ўзроўні МЗС. Пры гэтым на стаянках застаюцца грузавікі літоўскіх перавозчыкаў. Яны не выязджаюць з Беларусі, нягледзячы на тое, што мяжа паміж дзвюма краінамі функцыянуе з 20 лістапада. У Вільнюсе адмаўляюцца весці дыялог з афіцыйным Мінскам.
