Беларусь і Гана дамовіліся аб пастаўках 1840 адзінак сельскагаспадарчай тэхнікі, заявіў прэзідэнт Ганы Джон Драмані Махама.
«На сённяшні дзень Гана размясціла заказ на 1840 адзінак сельскагаспадарчай тэхнікі з Беларусі», — цытуе Махаму выданне Modern Ghana.
Тэхніка будзе накіравана ў цэнтры абслугоўвання фермераў, якія ствараюцца па ўсёй Гане.
Таксама Гана адкрывае магчымасці для беларускіх інвестыцый у камерцыйную сельскую гаспадарку, развіццё ірыгацыі, вытворчасць угнаенняў, птушкагадоўлю, аквакультуру, аграперапрацоўку і сельскагаспадарчую лагістыку, заявіў Махама.
Акрамя гэтага, Беларусь і Гана абмяркоўвалі супрацоўніцтва ў прамысловай вытворчасці, фармацэўтыцы, ахове здароўя, тэхналогіях і развіцці інфраструктуры. На наступным тыдні чакаецца прыезд у Гану беларускіх вытворцаў горназдабыўнога абсталявання для вывучэння інвестыцыйных магчымасцей у горназдабыўной галіне.
Прэзідэнт Ганы прыбыў у Беларусь з візітам 5 чэрвеня. Ён сустрэўся з Аляксандрам Лукашэнкам, наведаў выставу «Белагра» і прыняў удзел у беларуска-ганскім бізнес-форуме. Падчас візіту быў падпісаны пакет дакументаў.
