Індыйская кампанія SMPP завяршыла пастаўку 100 рэактыўных ударных дронаў-камікадзэ і шасці вучэбных комплексаў для індыйскай арміі, паведамляе прэс-служба кампаніі.
«Паспяховае завяршэнне паставак беспілотнікаў Peacekeeper (Agniveg) для Індыйскай арміі ў сціслыя тэрміны — усяго за шэсць месяцаў — з’яўляецца важнай вяхой як для кампаніі SMPP, так і для ўсёй экасістэмы айчыннай абароннай вытворчасці Індыі.
Сучасная вайна ўсё больш вызначаецца дакладнасцю, аўтаномнасцю і эканамічнай эфектыўнасцю, а такія сістэмы, як Peacekeeper (Agniveg), становяцца найважнейшымі сродкамі павышэння баявых магчымасцяў на полі бою», — заявіў генеральны дырэктар SMPP Ашыш Кансал.
Дроны Peacekeeper здольныя дзейнічаць ва ўмовах інтэнсіўнага радыёэлектроннага супрацьдзеяння, уключаючы падаўленне сігналаў і спробы спуфінгу. Беспілотнікі могуць развіваць хуткасць да 450 км/г, далёкасць палёту складае да 180 км. Яны прызначаны для паражэння камандных пунктаў, радыёлакацыйных станцый, лагістычных вузлоў і іншых стратэгічна важных ваенных аб’ектаў.
Як раней паведамляў BELPOL, у 2025 годзе Беларусь і Індыя падпісалі кантракт аб пастаўках каля 100 дронаў-камікадзэ «Міратворац». Пакупніком выступіла кампанія SMPP AMMUNITION PVT. LTD, прадаўцом — дзяржаўнае знешнегандлёвае ўнітарнае прадпрыемства «Белспецзнештэхніка».
Знешні выгляд і характарыстыкі дронаў «Міратворац» супадаюць з характарыстыкамі Peacekeeper.
