З Беларусі ў Літву вярнуліся ўжо 33 грузавікі, якія ўтрымліваліся на беларускай тэрыторыі з восені мінулага года.
«Паводле нашых падлікаў, да сённяшняй раніцы, прыкладна да сямі гадзін, усяго вярнулася 33 грузавікі з літоўскімі нумарамі», — заявіў агенцтву BNS у сераду раніцай Гедрус Мішуціс.
16 машын праехалі праз пункт пропуску “Мядзінінкай” і 17 – праз “Шальчынінкай”. Праверка такіх грузавікоў вядзецца ў асобных палосах.
«На літоўскім баку ў абодвух пунктах абсталяваны асобныя палосы, асобныя калідоры для грузавікоў, што ўязджаюць. Іх праверка праводзіцца вельмі аператыўна. Гэта часовая мера, прынятая з улікам таго, што іх пачалі выпускаць і яны вяртаюцца з Беларусі», – заявіў прадстаўнік памежнай службы.
Паводле яго слоў, за рулём практычна ўсіх грузавікоў знаходзіліся грамадзяне Беларусі з відам на жыхарства ў Літве. Адзін кіроўца быў грамадзянінам Польшчы, а яшчэ адзін-два з іншых краін.
Раней затрыманыя грузавікі складаюць каля адной шостай ад агульнага патоку грузавога транспарту, які перасёк мяжу.