З 15 па 16 красавіка ў краінах СНД праводзілася спецыяльнае мерапрыемства «Розыск», у межах якога сілавікі шукалі асоб, якія знаходзяцца ў вышуку, зніклых без вестак, адказчыкаў і даўжнікоў па грамадзянскіх і эканамічных справах, паведамляе газета МУС Беларусі “На страже”.
У выніку аперацыі затрымана больш за 270 чалавек, якія расшукваюцца МУС Беларусі. З іх 150 было затрымана ў Расіі.
Устаноўлена больш за 160 зніклых без вестак, з іх больш за 40 у Расіі. Таксама знойдзены 740 адказчыкаў і даўжнікоў па грамадзянскіх і эканамічных справах.
Так, у Краснагорску Маскоўскай вобласці была затрымана 59-гадовая жыхарка Мазыра, якая падманам завалодала больш чым 60 тысячамі рублёў у 12 жыхароў Гомельскай вобласці.
У Дагестане затрыманы 46-гадовы мінчанін, які падазраецца ў махлярстве на суму не менш за 480 тысяч рублёў і «экстрэмісцкай дзейнасці».
У Беларусі было затрымана 130 злачынцаў, устаноўлена месцазнаходжанне шасці зніклых без вестак, якіх шукаюць замежныя дзяржавы.
Сярод затрыманых — 59-гадовы іншаземец, які расшукваецца Узбекістанам за ўхіленне ад выплаты падаткаў у асабліва буйных памерах. У Ружанах затрыманы 32-гадовы іншаземец, які расшукваецца ў Расіі за згвалтаванне і гвалтоўныя дзеянні сексуальнага характару.
