Палітвязні, прымусова вывезеныя з Беларусі, знаходзяцца ў нявызначаным юрыдычным статусе: фармальна яны не памілаваныя і не вызваленыя, піша ініцыятыва Dissdentby.
«Яны не памілаваныя і не вызваленыя ў законным сэнсе, паколькі на руках у іх няма ніякіх афіцыйных дакументаў: ні рашэння суда, ні пастановы аб вызваленні, ні дакументаў аб спыненні крымінальнага пераследу. Фактычна людзей вывезлі з краіны без якога-небудзь прававога афармлення», — адзначаюць праваабаронцы.
У Беларусі міліцыя і супрацоўнікі КДБ працягваюць шукаць многіх з былых палітвязняў па месцы іх ранейшага пражывання. Гэта азначае, што юрыдычна чалавек усё яшчэ можа лічыцца фігурантам крымінальнай справы.
У асабліва ўразлівым становішчы знаходзяцца пенсіянеры. Яны не могуць атрымаць дакументы, якія пацвярджаюць іх пенсійны статус, бо афіцыйна частка апошняй групы вызваленых знаходзіцца «на следчых дзеяннях» у КДБ. У сувязі з гэтым налічэнне пенсіі прыпынена. Людзі застаюцца без сацыяльных выплат і без магчымасці пацвердзіць свой статус у краіне знаходжання.
