Украінскі тэлеканал ТСН распавёў падрабязнасці пра беларускую журналістку Іну Кардаш, затрыманую СБУ ў Кіеве па падазрэнні ў шпіянажы на карысць беларускага КДБ.
Супрацоўнікі СБУ прыглядаліся да Кардаш шмат гадоў, але яна была асцярожнай, знішчала ўсе доказы, часта мяняла нумары, знішчала тэлефоны, на асабістыя сустрэчы з куратарамі згаджалася толькі за мяжой і «на поўную сілу выкарыстоўвала жаночыя чары для агентурнай працы».
У 2016 годзе Іну Кардаш, маладую беларускую журналістку, пазнаёмілі з кіраўніком «вядучага інфармагенцтва Украіны» падчас пасяджэння трохбаковай кантактнай групы ў Мінску. Тэлеканал не называе імя рэдактара «з этычных меркаванняў».
«Ёй 25, яму 55. І ён трапіў — кажуць, не мог адвесці вачэй! А тая Кардаш ужо тады з’яўляецца актыўным агентам КДБ — Камітэта дзяржаўнай бяспекі Беларусі. Паводле легенды яна апазіцыйная журналістка, таму бясстрашна супрацоўнічае з украінскімі медыя і распавядае пра жыццё ў Мінску», — заяўляе ТСН.
У 2020 годзе Кардаш асвятляла пратэсты ў Беларусі, а пасля пераехала ва Украіну, сцвярджаючы, што на радзіме ёй пагражае небяспека. Яна пачынае працаваць ва ўкраінскім СМІ (вядома, што гэта «Інтэрфакс-Украіна»), хоць не ведае ўкраінскай мовы, атрымлівае асабістага кіроўцу, жыве ў асобным доме, у рэдакцыі працуе не ў ньюзруме з астатнімі журналістамі, а ў кабінеце кіраўніка.
«Калегі кажуць, што часам яны не маглі да яго зайсці і з нечым параіцца, бо яна заўсёды была там і заўсёды слухала», — гаворыцца ў сюжэце.
Кардаш рэгулярна сустракалася з лідарамі краін на неафіцыйных сустрэчах, ездзіла за мяжу на міжнародныя канферэнцыі, кантактавала з дыпламатамі як журналістка да смерці свайго апекуна. Журналістка асабліва цікавілася кітайскімі дыпламатамі.
Такая актыўнасць прыцягнула ўвагу супрацоўнікаў Дэпартамента абароны нацыянальнай дзяржаўнасці СБУ.
«Яна выкарыстоўвала гэтую працу і сувязі сваіх калег з гэтага сродку масавай інфармацыі для пашырэння ўласных кантактаў сярод украінскіх палітыкаў, вайскоўцаў і замежных дыпламатаў», — распавёў спікер Службы бяспекі Украіны Арцём Дзехцярэнка.
У межах крымінальнай вытворчасці СБУ пачынае прыглядацца да падазронай дзяўчыны.
Супрацоўнікі КДБ перавялі Кардаш грошы на набыццё ўласнага жылля ў Кіеве і далі ёй заданне інтэгравацца ў Інтэрнацыянальны легіён і сабраць звесткі пра яго байцоў.
«Прозвішча, імя, імя па бацьку, дата і месца нараджэння людзей, якія ваююць у гэтых падраздзяленнях, высветліць потым — гэта справа тэхнікі — якія ёсць сваякі ў Мінску, Гродне, Брэсце або ў Варонежы, знайсці гэтых людзей і аказваць на іх ціск. І галоўнае для расіян і беларусаў было зразумець каналы, па якіх замежнікаў забіраюць з Расійскай Федэрацыі. Увесь гэты шлях расіян вельмі цікавіў. Каб потым гэтыя каналы ламаць», — распавёў ваенны эксперт, экс-супрацоўнік СБУ Іван Ступак.
Кардаш выкарыстоўвае сэкс, каб завербаваць камандзіра баявога падраздзялення, які некалькі гадоў правёў на перадавой. Запіс спробы вярбоўкі раней публікавала СБУ. «І цябе ніхто ні да чаго не прымушае. Увогуле. Не хочаш — не трэба. Гэта не КДБ. Гэта значна вышэй», — казала Кардаш.
Баец, якога вербавала Кардаш, пазней заявіў, што не здаў яе СБУ, бо закахаўся «да вар’яцтва». Сама Кардаш у перапісцы з куратарам называла яго «мой лох».
На апошнім этапе заданнем Кардаш было ўкараніцца ў кітайскую амбасаду і даведацца інфармацыю пра ўкраінска-кітайскія адносіны, а затым — уладкавацца на працу ў ГУР. Украінскія спецслужбы дазволілі ёй гэта зрабіць у межах аператыўнай гульні.
«Супрацоўнікі КДБ Беларусі старанна інструктавалі яе — як і на каго ёй трэба выйсці, пра што пытацца. І ўсё ж планам-максімумам для Іны Кардаш было — уладкавацца ў Галоўнае ўпраўленне разведкі Украіны. І супрацоўнікі Службы бяспекі Украіны сумесна з уласнай службай бяспекі Галоўнага ўпраўлення разведкі дазваляюць ёй гэта зрабіць. Бо яны таксама ўмеюць гуляць у шпіёнаў», — гаворыцца ў відэа.
У ГУР вакол Кардаш цыркулявала кантраляваная інфармацыя, якую тая перадавала КДБ.
ТСН паказвае кадры затрымання Кардаш. Яе затрымалі ў кавярні разам з мужчынам у вайсковай форме. Падчас затрымання ён супраціўляўся і не да канца разумеў, што адбылося. Кардаш спакойна за ўсім назірала.
Цяпер Кардаш знаходзіцца ў СІЗА без права ўнясення закладу. Ёй прад’явілі падазрэнне па ч. 1 арт. 114 Крымінальнага кодэкса Украіны (шпіянаж). Паводле гэтага артыкула пагражае да 15 гадоў пазбаўлення волі з канфіскацыяй маёмасці. Экс-супрацоўнік СБУ Ступак лічыць, што Беларусь паспрабуе абмяняць Кардаш.
