Вярхоўная Рада Украіны 11 сакавіка прыняла пастанову са зваротам да ўрадаў Польшчы, Фінляндыі, Літвы, Латвіі і Эстоніі аб увядзенні поўнай забароны на экспартна-імпартныя аперацыі і транзіт тавараў з Расіяй і Беларуссю. Парламент таксама заклікаў гэтыя краіны дамагчыся ўключэння адпаведных абмежаванняў у наступныя санкцыйныя пакеты ЕС.
У пастанове падкрэсліваецца, што гандаль ЕС з Расіяй і Беларуссю застаецца значнай крыніцай даходаў для гэтых рэжымаў і спрыяе фінансаванню іх ваенна-прамысловых комплексаў. У пацвярджэнне прыводзіцца наступная статыстыка: за 10 месяцаў 2025 года Латвія экспартавала ў Расію і Беларусь тавары на 941,5 млн еўра, імпарт расійскіх угнаенняў у Польшчу за 2024 год вырас амаль на 130% у параўнанні з 2022 годам. За 11 месяцаў 2024 года ЕС прадаў Беларусі тавары на 6,63 млрд еўра, найбуйнейшым пакупніком беларускіх тавараў была Польшча — на 436,4 млн еўра.
Увядзенне поўнага гандлёвага эмбарга на ўсходніх межах ЕС, на думку ўкраінскіх парламентараў, стане важным крокам ва ўзмацненні эканамічнага ціску на дзяржавы-агрэсары і ўмацаванні бяспекі Еўропы.
Рэзалюцыю пракаментаваў намеснік кіраўніка Аб’яднанага пераходнага кабінета і кіраўнік Народнага антыкрызіснага ўпраўлення Павел Латушка.
«Пытанне гандлёвых абмежаванняў наўпрост звязана з паводзінамі рэжыму Лукашэнкі. Вызваленне палітычных зняволеных, спыненне рэпрэсій і спыненне падтрымкі расійскай агрэсіі з’яўляюцца ключавымі ўмовамі для змянення стаўлення еўрапейскіх краін да эканамічных кантактаў з Беларуссю. У адваротным выпадку — ціск на рэжым будзе толькі ўзмацняцца, уключаючы пашырэнне санкцый і магчымае гандлёвае эмбарга», — заявіў ён.
