Польскія памежнікі сумесна з мытна-падатковай службай затрымалі пяць чалавек па справе аб абыходзе санкцый пры пастаўках беларускай і расійскай фанеры. Як паведамілі ў Марскім аддзеле Памежнай аховы, узрост затрыманых — ад 43 да 64 гадоў. Сярод іх чатыры грамадзяніна Польшчы і адзін — Расіі. Яны звязаныя з кампаніямі, якія знаходзіліся ў Паморскім ваяводстве.
Гэтыя кампаніі ў 2022 годзе ўвозілі фанеру з Казахстана, аднак насамрэч яна мела беларускае і расійскае паходжанне. Расследаванне было пачата ў 2023 годзе. У выніку была выкрытая схема абыходу санкцый.
Затрыманым прад’яўленыя абвінавачанні ў «прадстаўленні мытным органам ілжывай інфармацыі аб выкананні кантрактаў, заключаных да ўвядзення санкцый, а таксама ў імпарце драўнянай прадукцыі, такой як фанера і рэйкі, вырабленай і экспартаванай з Беларусі, на якую распаўсюджваюцца нетарыфныя абмежаванні, уведзеныя ў сувязі з міжнароднымі санкцыямі».
Расследаванне працягваецца. У Памежнай ахове не выключаюць новых арыштаў.
Нагадаем, у 2022–2024 гадах «Беларускі расследавальніцкі цэнтр» у супрацоўніцтве з партнёрамі з Польшчы, краін Балтыі, «Кіберпартызанамі» і OCCRP апублікаваў некалькі расследаванняў пра пастаўкі прадукцыі дрэваапрацоўкі з Беларусі ў абыход санкцый, у тым ліку фанеры. У пачатку гэтага года выданне Earthsight таксама апублікавала расследаванне на гэтую тэму.
