У Літве ўзмацняюцца дыскусіі пра абмежаванне або поўную забарону аўтобусных зносін з Беларуссю. Падставай служаць пагрозы затрыманняў, вярбоўкі і выкарыстання замежнікаў беларускім рэжымам у прапагандысцкіх мэтах, піша Delfi.
Цяпер з Вільні ў Мінск штодня адпраўляюцца не менш за 12 аўтобусаў. Нягледзячы на папярэджанні ўладаў, многія пасажыры працягваюць ездзіць у Беларусь. Міністр транспарту Літвы Эўгеніюс Сабуціс пакуль не бачыць неабходнасці ў поўнай забароне. Паводле яго слоў, колькасць маршрутаў ужо скарочана амаль удвая, і гэтага дастаткова для кантролю сітуацыі.
«Пакуль адпаведныя службы не рэкамендуюць іншых мер, мы не бачым прычын абмяжоўваць свабоду перамяшчэння людзей», — заявіў ён.
Тым часам лідар лібералаў Вікторыя Чмілітэ-Нільсен заявіла, што Беларусь выкарыстоўвае людзей як палітычных закладнікаў, нагадаўшы пра неаднаразовыя затрыманні замежных грамадзян і іх выкарыстанне ў прапагандзе.
Лідар літоўскіх кансерватараў Лаўрынас Кашчунас заклікаў краіны Балтыі дзейнічаць узгоднена.
«Калі Латвія ўзмоцніць абмежаванні, а Літва — не, мы можам стаць слабым звяном», — лічыць ён.
Нагадаем, Міністэрства паведамлення Латвіі распрацавала папраўкі, якія прадугледжваюць поўную забарону рэгулярных аўтобусных пасажырскіх перавозак у Расію і Беларусь, абгрунтоўваючы гэта неабходнасцю абароны грамадзян ад пагроз з боку аўтарытарных рэжымаў.
