У Белгідрамеце параўналі цыклоны «Улі» і «Хаўер». “Улі”, які накрыў Беларусь на мінулым тыдні, аказаўся больш снежным, чым «Хаўер», аднак цыклон 2013 года ўзяў першынство па сіле ветру. Пра гэта на прэс-канферэнцыі ў Нацыянальным прэс-цэнтры паведаміла начальніца службы метэаралагічных прагнозаў Белгідрамета Марына Грыцкевіч.
“Ападкаў усё ж такі ён прынёс больш, чым «Хаўер». І вышыня снежнага покрыва ўсё ж такі аказалася ў ім большай, чым у «Хаўеры». Паводле даных на вечар 9 студзеня, вышыня снегу, які ён прынёс, — ад 1 да 28 сантыметраў. На метэастанцыі Беразіно — 31 см. Па колькасці ападкаў выпала ад 5 да 43 міліметраў. У чым перавага «Хаўера», дакладней, першынство «Хаўера»? Гэта вецер. Ветравы рэжым у «Хаўеры» быў 15–24 метры ў секунду”, — сказала яна.
Яна дадала, што падчас «Улі» на шэрагу метэастанцый былі пабітыя шматгадовыя рэкорды ападкаў.
“Усе разлікі траекторыі цыклона лічылі, што крыху ўсходней ён пройдзе, і ўся Рэспубліка Беларусь апынецца пад снежнымі ападкамі. Але разам з тым у апошні момант ён унёс карэктывы ў сваю траекторыю, выйшаў з цэнтрам на Гомельскую вобласць. І вось жыхары крайніх раёнаў Гомельскай вобласці — гэта Брагін, Гомель, вось Чачэрск — і крайнія ўсходнія раёны Магілёўскай вобласці (Касцюковічы), напэўна, адчулі вадкую фазу ападкаў разам з галалёдам. На шчасце, гэты перыяд дажджоў пры адмоўнай тэмпературы быў нядоўгі. Хутка фаза ўсё ж такі зноў перайшла ў снег”, — дадала першая намесніца начальніка Белгідрамета Наталля Чатырка.
