Прэс-служба Бі-бі-сі распаўсюдзіла заяву ў сувязі з уключэннем рускай службы рэсурсу ў спіс “экстрэмісцкіх” матэрыялаў у Беларусі.
«Мы адхіляем гэты крок беларускіх уладаў, які закліканы крыміналізаваць нашу незалежную журналістыку. Мы глыбока занепакоеныя тымі наступствамі, якія ўключэнне Рускай службы Бі-бі-сі ў спіс экстрэмісцкіх матэрыялаў можа мець для сотняў тысяч жыхароў Беларусі, якія кожны тыдзень звяртаюцца да Бі-бі-сі ў пошуках такой неабходнай ім дакладнай і бесстаронняй інфармацыі. Бі-бі-сі з’яўляецца самай дакладнай крыніцай міжнародных навін у свеце, і мы застаемся прыхільнымі нашай аўдыторыі ў Беларусі», — падкрэслілі ў карпарацыі.
Нагадаем, днямі паведамлялася, што Міністэрства інфармацыі Беларусі ўнесла сайт bbc.com у спіс экстрэмісцкіх матэрыялаў на падставе рашэння суда Ленінскага раёна Магілёва.
«Інфармацыйная прадукцыя: Інтэрнэт-сайт з назвай BBC NEWS РУССКАЯ СЛУЖБА» з ідэнтыфікатарам https://bbc.com», — гаворыцца ў спісе.
Пры гэтым пакуль не ясна, ідзе гаворка пра ўвесь кантэнт карпарацыі або канкрэтна пра матэрыялы Рускай службы Бі-бі-сі.
Кіраўнік прававога цэнтра Беларускай асацыяцыі журналістаў Алег Агееў растлумачыў, што пад адміністрацыйную адказнасць можа падпадаць як кантэнт Рускай службы, так і ўвесь сайт bbc.com. На гэта звярнуў увагу і праваабарончы цэнтр «Вясна»: паколькі Руская служба знаходзіцца па адрасе bbc.com/russian, уключэнне bbc.com у спіс фактычна азначае прызнанне экстрэмісцкім усяго сайта Бі-бі-сі.
Нагадаем, у абвінавачанні ў экстрэмізме выкарыстоўваюцца ў Беларусі для барацьбы з апанентамі і іншадумствам у цэлым.
