Прэзідэнт ЗША Дональд Трамп у сваёй сацсетцы Truth Social перапосціў рэдактарскую калонку New York Post пад загалоўкам «Гучныя заявы Пуціна пра „атаку“ паказваюць, што менавіта Расія перашкаджае міру».
Аўтары пішуць, што «Пуцін не з’яўляецца сумленным пасярэднікам, здольным бачыць разумныя аргументы», і выказваюць сумневы, што інцыдэнт увогуле меў месца.
«Забаўна, што Пуцін, які вядзе жорсткую вайну ўжо амаль чатыры гады, лічыць, што любое гвалтоўнае дзеянне ў яго ваколіцах заслугоўвае асаблівага абурэння. У рэшце рэшт, Расія запусціла 131 дрон на Раство ў Кіеве і іншых гарадах, забіўшы сем мірных жыхароў. Мірных жыхароў. Крэмль наўмысна нацэльваецца на жылыя дамы і электрастанцыі, каб пакараць простых людзей Украіны. Расіяне выкрадаюць дзяцей. Яны катуюць і караюць смерцю зняволеных. Акрамя таго, Масква неаднаразова спрабавала забіць Зяленскага. Любая атака на Пуціна больш чым апраўданая», — гаворыцца ў матэрыяле.
«Але вось у чым загваздка: удар беспілотніка, хутчэй за ўсё, ніколі не меў месца. Зяленскі рашуча гэта адмаўляў. Пяскоў заявіў, што расіяне не могуць прадставіць ніякіх доказаў, і заклікаў прэсу „паверыць Крамлю на слова“. Не, мы не паверым.
Уся вайна Пуціна — гэта хлусня, „спецыяльная ваенная аперацыя“ па „дэнацыфікацыі“ краіны, якой не кіруюць нацысты. У дадзеным выпадку здаровы сэнс падказвае, што гэта выдуманая або прыўпрыгожаная гісторыя, каб даць Расіі нагоду адхіліць прагрэс Трампа», — заяўляюць журналісты.
Нагадаем, 29 снежня кіраўнік МЗС Расіі Сяргей Лаўроў заявіў, што Украіна атакавала рэзідэнцыю Пуціна, выкарыстаўшы 91 беспілотнік. Ён заявіў, што ў сувязі з гэтым Расія зменіць сваю перамоўную пазіцыю, а таксама прыгразіў адказам Кіеву і папярэдзіў, што мэты ўжо выбраныя. Прэзідэнт Украіны Уладзімір Зяленскі назваў расійскія заявы хлуснёй.
Падчас учорашняй прэс-канферэнцыі з прэм’ер-міністрам Біньямінам Нетаньяху Трамп высказаўся пра заявы РФ пра атаку на рэзідэнцыю.
«Я насамрэч толькі што пра гэта пачуў, але нічога пра гэта не ведаю. Гэта было б вельмі крыўдна», — сказаў спачатку Трамп.
Аднак пазней прэзідэнт ЗША прызнаў, што Пуцін распавёў яму пра інцыдэнт.
«Пуцін распавёў мне пра гэта рана раніцай. Ён сказаў, што на яго напалі. Гэта нядобра. Гэта нядобра. Не забывайце, я спыніў „Тамагаўкі“. Адно — быць агрэсіўным, а другое — нападаць на яго дом. Цяпер не час для такіх дзеянняў», — заявіў Трамп.
Сёння Лукашэнка назваў інфармацыю пра атаку «дзічэйшым тэрарызмам», накіраваным на зрыў мірнага працэсу. Паводле яго слоў, Уладзіміру Зяленскаму трэба дамаўляцца, пакуль не стала позна. У сённяшняй тэлефоннай размове з Пуціным ён таксама абмяркоўваў атаку на рэзідэнцыю ў Наўгародскай вобласці.
