Суд у Кіеве адмовіўся вызваліць падазраваную ў шпіянажы беларуску Іну Кардаш з-пад варты пад заклад і падпіску аб нявыездзе, паведамляе «Радыё Свабода».
Кардаш падала апеляцыю на рашэнне суда першай інстанцыі аб утрыманні яе пад вартай, указаўшы, што прад’яўленыя падазрэнні грунтуюцца «на здагадках і не пацверджаныя ніякімі доказамі». Апеляцыю разгледзелі 13 мая. Кардаш удзельнічала ў пасяджэнні суда па відэасувязі з кіеўскага следчага ізалятара.
Суд прызнаў законным рашэнне аб падаўжэнні тэрміну ўтрымання Кардаш пад вартай да 14 чэрвеня.
Нагадаем, СБУ і ГУР паведамілі пра затрыманне Кардаш 27 студзеня. СБУ заяўляла, што яна супрацоўнічала з КДБ з 2015 года. Яна працавала на тэлеканале Медведчука «112» і ў «Інтэрфакс Украіна».
У 2020 годзе беларускія спецслужбы накіравалі Кардаш працаваць ва Украіну. У яе задачу ўваходзіў збор інфармацыі пра беларусаў і расіян, якія дапамагаюць Украіне. Таксама яна павінна была наладзіць кантакты з супрацоўнікамі пасольства Кітая ва Украіне, каб збіраць разведвальныя даныя пра дзейнасць кітайскіх дыпламатаў ва Украіне.
У 2025 годзе яна ўладкавалася на працу ў Каардынацыйны цэнтр ГУР па пытаннях абыходжання з ваеннапалоннымі, дзе збірала службовую інфармацыю — фатаграфавала дакументы і запісвала размовы супрацоўнікаў. Гэтыя даныя яна перадавала ў Беларусь.
