У палітзняволенай Таццяны Колас, асуджанай па «справе Чорнай кнігі Беларусі», дыягнаставалі анкалагічнае захворванне. Пра гэта паведамляе праваабарончы цэнтр «Вясна».
Паводле інфармацыі праваабаронцаў, для далейшага абследавання і лячэння жанчыну павінны перавесці ў бальніцу. Аднак зрабіць гэта плануецца толькі праз некалькі месяцаў.
Акрамя таго, Таццяна пакутуе ад моцных боляў у спіне, звязаных з раней перанесеным кампрэсійным пераломам пазваночніка.
Таццяна Колас знаходзіцца пад вартай больш за 4 гады. У кастрычніку 2022 года Мінскі гарадскі суд прысудзіў былую супрацоўніцу Мінгарвыканкама да 6,5 года пазбаўлення волі паводле чатырох артыкулаў Крымінальнага кодэкса. Яе прызналі вінаватай паводле абвінавачанняў, звязаных з перадачай даных тэлеграм-каналу «Чорная кніга Беларусі».
Паводле версіі следства, жанчына, якая мела доступ да персанальных даных супрацоўнікаў сілавых структур, перадавала гэтую інфармацыю тэлеграм-каналу. Колас была асуджаная паводле артыкулаў аб незаконных дзеяннях з персанальнымі данымі, распальванні сацыяльнай варожасці, неправамерным завалоданні камп’ютарнай інфармацыяй і перавышэнні службовых паўнамоцтваў.
Таццяна Колас была затрыманая ў чэрвені 2022 года. У яе ёсць непаўналетні сын. Цяпер палітзняволеная ўтрымліваецца ў жаночай папраўчай калоніі № 4 у Гомелі.
