У пункце пропуску Брэст беларускія памежнікі затрымалі 55-гадовую грамадзянку Нідэрландаў, якая спрабавала ўвезці ў Беларусь з Польшчы марыхуану. Інцыдэнт адбыўся 7 ліпеня, паведамляе прэс-служба Дзяржаўнага пагранічнага камітэта Беларусі.
Падчас агляду аўтамабіля вайскоўцы выявілі некалькі пакетаў з рэчывам расліннага паходжання, якое экспертыза ідэнтыфікавала як марыхуану. Пры паглыбленым надглядзе былі знойдзены яшчэ два пакеты з аналагічным рэчывам, грындар-здрабняльнік і шэсць шкляных флаконаў з рэшткамі алею CBD.
«Падчас следчых мерапрыемстваў жанчына паводзіла сябе агрэсіўна. Медыцынскае асведчанне пацвердзіла факт ужывання ёю марыхуаны», — гаворыцца ў прэс-рэлізе.
Паводле слоў затрыманай, яна накіроўвалася ў Маскву да дачкі, аднак дакладны адрас яе пражывання назваць не змагла.
Узбуджаны крымінальныя справы аб незаконным абароце наркатычных сродкаў і іх незаконным перамяшчэнні праз мяжу.
