Сенат Чэхіі прыняў рэзалюцыю «Аб падтрымцы дэмакратычных сіл Беларусі і звароце да ўрада Чэшскай Рэспублікі». Дакумент быў ухвалены 8 ліпеня падчас 27-га пасяджэння верхняй палаты парламента.
У рэзалюцыі сенатары нагадалі пра раней прынятае рашэнне ў падтрымку дэмакратычных сіл Беларусі пасля выступлення Святланы Ціханоўскай у чэшскім Сенаце ў 2021 годзе. У дакуменце адзначаецца, што беларускія ўлады сістэматычна парушаюць правы чалавека і актыўна падтрымліваюць расійскую агрэсію супраць Украіны, што ўяўляе пагрозу бяспецы Еўропы. Сенат указвае, што, нягледзячы на вызваленне часткі зняволеных у 2025–2026 гадах, у Беларусі па-ранейшаму застаюцца больш за 800 палітычных зняволеных.
Сенат Чэхіі называе рэжым Аляксандра Лукашэнкі «нелегітымным, супрацьзаконным і злачынным». Акрамя таго, дэпутаты падтрымалі ідэю аб тым, каб міжнародны трыбунал або спецыяльны трыбунал па Украіне таксама расследаваў магчымую адказнасць Лукашэнкі і яго паплечнікаў.
У дакуменце таксама змяшчаецца шэраг рэкамендацый ураду Чэхіі. У прыватнасці, Сенат заклікаў працягнуць падтрымку грамадзянскіх свабод і вяршэнства права ў Беларусі, дамагацца вызвалення ўсіх палітычных зняволеных, аказваць фінансавую і практычную дапамогу праваабаронцам і незалежным СМІ, у тым ліку праз візавыя механізмы, а таксама пашыраць санкцыйныя спісы ў дачыненні да грамадзян Беларусі, датычных да найбольш цяжкіх злачынстваў, якія падпадаюць пад міжнародную юрысдыкцыю.
Акрамя таго, сенатары рэкамендавалі чэшскім прадстаўнікам у Парламенцкай асамблеі АБСЕ далучыцца да Альянсу за дэмакратычную Беларусь, працягнуць падтрымку беларускай дыяспары ў выгнанні і садзейнічаць наведванню сваякамі беларусаў, якія атрымалі міжнародную абарону ў Чэхіі.
