Службы Нацыянальнага аэрапорта “Мінск” працуюць ва ўзмоцненым рэжыме на фоне складаных надворных умоў, звязаных з працяглымі снегападамі. Пра гэта паведамілі ў адміністрацыі аэрапорта.
Інтэнсіўная ўборка снегу і апрацоўка аэрадромнай інфраструктуры супрацьгалалёднымі рэагентамі працягваецца ўжо другія суткі. Аэрапорт працягвае функцыянаваць у штатным рэжыме ў складаных метэаўмовах, гаворыцца ў прэс-рэлізе. Выведзены дадатковыя рэзервы тэхнікі, узмоцнены брыгады рабочых і кіроўцаў.
Для захавання бяспекі палётаў задзейнічана каля 50 адзінак спецыялізаванай снегаўборачнай і камунальнай тэхнікі, у тым ліку машыны для размеркавання хімічных рэагентаў. У работах удзельнічаюць больш за 220 супрацоўнікаў аэрапорта.
Як паведамілі ў прэс-службе аэрапорта, снегаўборачная тэхніка на ўзлётна-пасадачнай паласе працуе практычна бесперапынна. Паралельна праводзіцца перадпалётная супрацьабледзяняльная апрацоўка паветраных суднаў для выдалення замёрзлых ападкаў і прадухілення іх утварэння да ўзлёту.
У аэрапорце падкрэслілі, што валодаюць неабходнымі рэзервамі рэсурсаў для стабільнай працы ў складаных метэаўмовах. Сфарміраваны дастатковы запас супрацьабледзяняльных вадкасцяў усіх тыпаў і рэагентаў для апрацоўкі лётнага поля.
Пасажырам рэкамендавана загадзя планаваць паездку ў аэрапорт з улікам надворных умоў і дарожнай абстаноўкі. Актуальны статус рэйсаў даступны на афіцыйным сайце аэрапорта і ў авіякампаній.
Нагадаем, сёння з-за непагадзі многія рэйсы з аэрапорта Мінска былі адпраўленыя з затрымкамі.
