Стакгольмскі міжнародны інстытут даследавання праблем міру (SIPRI) апублікаваў штогадовы даклад аб міжнародных пастаўках узбраенняў. У ім ацэньваюцца тэндэнцыі 2021–2025 гадоў.
Паводле дадзеных SIPRI, на долю Беларусі ў перыяд 2021–2025 гадоў прыпадала 0,9% сусветнага імпарту ўзбраенняў. У параўнанні з папярэднім ацэньваемым перыядам 2016–2020 гадоў доля нашай краіны вырасла на 73%. Амаль усё ўзбраенне, паводле інфармацыі SIPRI, Беларусь атрымлівала з Расіі, на долю Ірана прыпадала 0,1% імпарту ў нашу краіну, а Кітая — менш за 0,05%. Нагадаем, Беларусь у апошнія гады атрымала расійскія знішчальнікі Су-30СМ2, верталёты Мі-35М, бронетранспарцёры БТР-82А, зенітныя ракетныя комплексы і інш.
Беларусь пры гэтым была трэцім па аб’ёмах кліентам Расіі, на долю якога прыпала 6,8% сусветнага экспарту ў 2021–2025 гадах. Паводле дадзеных SIPRI, 48% расійскага экспарту ішло ў Індыю, 13% — у Кітай і 13% — у Беларусь. Трэба адзначыць, што доля РФ у сусветным экспарце зброі знізілася на 64%. У 2016–2020 гадах Расія адказвала за 21% сусветнага экспарту зброі.
Беларусь не трапіла ў 25 найбуйнейшых экспарцёраў зброі.
Аб’ём перадаваемага паміж краінамі ўзбраення ў 2021–2025 гадах вырас на 9,7% у параўнанні з папярэднім перыядам 2016–2020 гадоў.
Асноўнай тэндэнцыяй у SIPRI называюць рост паставак Украіне. На яе долю прыпадае 9,7% сусветнага імпарту зброі, што робіць Украіну найбуйнейшым атрымальнікам узбраенняў. У структуры ўкраінскага імпарту ўзбраенняў першае месца займаюць ЗША (41%), другое — Германія (14%), а трэцяе — Польшча (9,4%). Таксама ў дакладзе адзначаецца рост попыту ў Еўропе.
ЗША з’яўляюцца найбуйнейшым экспарцёрам зброі, забяспечваючы 42% усіх паставак. У 2021–2025 гадах Злучаныя Штаты пастаўлялі зброю ў 99 дзяржаў. Найбуйнейшымі атрымальнікамі амерыканскай зброі былі Саудаўская Аравія (12%), Украіна (9,4%), Японія (8,9%).
Другое месца ў рэйтынгу экспарцёраў займае Францыя, на якую прыпадае 9,8% экспарту. Асноўнымі атрымальнікамі французскай зброі названы Індыя (24%), Егіпет (11%) і Грэцыя (10%). Трэцяе месца ў Расіі.
У тройку найбуйнейшых імпарцёраў зброі ўваходзяць, акрамя Украіны, Індыя (8,2%) і Саудаўская Аравія (6,8%).
