Віцэ-мэр Вільнюса Вітаўтас Міталас унёс на разгляд Вільнюскага савета рашэнне аб тым, каб дзеці зноў прыбываючых замежнікаў прымаліся толькі ў школы з навучаннем на літоўскай мове, пачынаючы з пачатковай адукацыі. Гэта можа прывесці да закрыцця адзінай у літоўскай сталіцы беларускамоўнай гімназіі імя Францыска Скарыны.
“Даследаванні і практыка паказваюць: менавіта ў пачатковых класах мова засвойваецца хутчэй за ўсё. У той жа час высокая канцэнтрацыя прыезджых у школах з рускай мовай навучання ўскладняе магчымасці паляпшэння вынікаў па літоўскай мове — на гэта ўказваюць і самі школы”, — напісаў літоўскі палітык у сваім блогу ў Facebook.
На думку Вітаўтаса Міталаса, сістэма інтэграцыі буксуе.
“Аднак праблема яшчэ глыбей — наша міграцыйная палітыка больш не адаптаваная да бягучай сітуацыі. Міграцыя не можа быць працэсам, які «проста адбываецца». Мы абавязаныя ёю кіраваць”, — лічыць ён.
Віцэ-мэр Вільнюса ўпэўнены, што калі мігрант прымае рашэнне застацца, ён павінен выконваць выразныя інтэграцыйныя абавязацельствы, асновай якіх з’яўляецца мова.
“За апошнія гады ў Вільнюсе было зроблена шмат для ўмацавання вывучэння літоўскай мовы: скарачаецца колькасць дзіцячых садкоўскіх груп з навучаннем на рускай мове, уводзіцца двухмоўнае навучанне, усё больш школ выкладаюць прадметы на літоўскай мове, павялічваюць колькасць урокаў літоўскай мовы або адкрываюць класы з навучаннем на літоўскай мове.
Я вельмі ганаруся школамі, якія пры адсутнасці падтрымкі дзяржаўнай адукацыйнай палітыкі смела бяруцца за пераўтварэнні. Таму я заклікаю вільнюскія школы з навучаннем на рускай мове замацаваць літоўскую мову ў сваіх статутах і паказаць, як можна сумясціць якасную адукацыю, інтэграцыю і захаванне роднай мовы”, — напісаў Вітаўтас Міталас.
Калі рашэнне ўладамі Вільнюса будзе прынятае, пад пагрозай апынецца праца адзінай у літоўскай сталіцы беларускамоўнай гімназіі імя Францыска Скарыны. Такое меркаванне Reform.news выказалі бацькі дзяцей, якія вучацца ў беларускамоўнай навучальнай установе.
“Калі прымуць рашэнне, беларусам, якія прыехалі — не маюць грамадзянства, забароняць ісці ў Скарынаўку”, — лічыць беларус, які папрасіў не называць свайго імя.
Да 2020 года гімназія паступова ператваралася ў навучальную ўстанову, дзе беларусы ўжо не вучыліся, а беларуская мова амаль не выкарыстоўвалася. Новая палітычная хваля беларусаў-мігрантаў прывяла да таго, што ў гімназію прыйшлі беларускія дзеці, якія хацелі вучыцца па-беларуску.
“Нарэшце дастаткова беларусаў у Літве. Нарэшце пачала вяртацца беларуская ў Скарынаўку. Давучацца тыя, хто ўжо там, і ўсё”, — сетуе наш суразмоўца.
Ён лічыць, што беларусы не з’яўляюцца пагрозай для Літвы, а беларускамоўныя беларусы толькі ўмацуюць яе бяспеку.
“Але трэба даваць беларусам магчымасць захоўваць сваю мову ў момант, калі, нарэшце, яны да яе павярнуліся. Гэта спрыяе бяспецы і Літвы ў рэшце рэшт”, — упэўнены бацька дзяцей, якія ходзяць у “Скарынаўку”.
Ён лічыць, што Літва не павінна беларусам забараняць вучыцца на сваёй роднай мове.
“Маем адзіную ў свеце школу такую за межамі Беларусі. І ў момант беспрэцэдэнтнай сітуацыі ўнутры Беларусі пазбавіць беларусаў магчымасці вучыцца на сваёй мове?” — задаў ён рытарычнае пытанне.
У каментарыях да свайго допісу віцэ-мэр Вільнюса Вітаўтас Міталас адзначыў, што ў савеце існуюць меркаванні аб неабходнасці зрабіць выключэнне для польскай мовы як адной з моў Еўрапейскага саюза.
