Сёння адбылася тэлефонная размова паміж прэзідэнтам РФ Уладзімірам Пуціным і прэм’ер-міністрам Венгрыі Віктарам Орбанам.
Як паведамілі ў прэс-службе Крамля, размова датычылася двухбаковых адносін, а таксама рэалізацыі дамоўленасцяў, дасягнутых падчас візіту Орбана ў Маскву ў лістападзе мінулага года.
Трэба адзначыць, што размова адбылася на фоне прыпынення паставак нафты ў Венгрыю па “Дружбе”. Орбан неаднаразова ў апошні час патрабаваў аказаць ціск на Украіну з мэтай іх аднаўлення. Пастаўкі былі прыпынены пасля пашкоджання нафтаправода ў выніку расійскага ўдару.
“Абмеркавана рэзка абвостраная абстаноўка вакол Ірана і ва ўсім блізкаўсходнім рэгіёне, у тым ліку з пункту гледжання магчымых наступстваў для стану сусветнага энергетычнага рынку.
Пры абмене меркаваннямі па Украіне Уладзімір Пуцін адзначыў прынцыповую пазіцыю кіраўніцтва Венгрыі ў падтрымку палітыка-дыпламатычнага ўрэгулявання канфлікту, як і ў цэлым імкненне праводзіць узважаны і суверэнны курс у міжнародных справах.
Закрануты таксама пытанні, якія датычацца грамадзян Венгрыі, мабілізаваных ва ўзброеныя сілы Украіны і якія трапілі ў расійскі палон.
Дамоўлена пра працяг кантактаў на розных узроўнях”, – гаворыцца ў паведамленні прэс-службы Крамля.
