Польская пракуратура накіравала ў суд крымінальную справу ў дачыненні да грамадзяніна Расіі Анатолія Б. (Блінова – заўв. Reform.news). Ён абвінавачваецца ў арганізацыі нападу на расійскага апазіцыйнага актывіста Леаніда Волкава з Фонду барацьбы з карупцыяй.
Усяго абвінавачанне датычыцца пяці эпізодаў. Першы — арганізацыя падпалу копіі турэмнай камеры Аляксея Навальнага ў Вільнюсе ў ліпені 2023 года. Другі — прымяненне сілы супраць грамадзян РФ, якія пражываюць у Аргенціне, у тым ліку арганізацыя нападу на аднаго з іх у верасні 2023 года ў Буэнас-Айрэсе. Трэці — падбухторванне да нападу на Волкава ў лістападзе 2023 года. Тады да збіцця не дайшло.
Чацвёрты — арганізацыя збіцця Волкава, якое адбылося ў сакавіку 2024 года. Тады на яго напалі двое грамадзян Польшчы Ігар С. і Максіміліян К.
Пятае абвінавачанне датычыцца выкарыстання падробленых вадзіцельскіх пасведчанняў.
Абвінавачаны застаецца пад вартай.
У паведамленні пракуратуры адзначаецца, што ў ходзе расследавання абвінавачанні былі прад’яўлены 10 фігурантам. Расследаванне ў дачыненні да тых, хто нападаў на Волкава, грамадзян Польшчы працягваецца.
