Пасольства ЗША абвергла інфармацыю пра тое, што яно пакінула Кіеў.
«Пасольства ЗША адкрытае. Ніякіх змен у нашай дзейнасці няма, а ўсе іншыя паведамленні з’яўляюцца ілжывымі», — гаворыцца ў паведамленні дыпламатычнага ведамства.
МЗС Украіны таксама выступіла з адпаведным абвяржэннем.
Раней вярхоўная прадстаўніца ЕС па замежных справах і палітыцы бяспекі Кая Калас заявіла, што еўрапейскія дыпламаты застаюцца працаваць у Кіеве, у той час як Амерыка сышла.
«Таксама ўчора мы пачулі з Украіны, што ўсе пасольствы засталіся, акрамя аднаго, таму гэта таксама патрабуе ад гэтых пасольстваў смеласці, але так, усе еўрапейскія засталіся, Амерыка сышла», — сказала яна.
Нагадаем, нядаўна РФ прыгразіла ўдарамі па Кіеве, прапанаваўшы замежнікам пакінуць украінскую сталіцу.
Як піша «РБК-Украіна», дарадца прэзідэнта Украіны Уладзіміра Зяленскага па камунікацыях Дзмітрый Літвін выказаў здагадку, што словы Калас маглі быць звязаныя з масіраваным расійскім ударам па Кіеве ў ноч на нядзелю. Паводле яго слоў, тады была інфармацыя, што амерыканскія дыпламаты выязджалі з украінскай сталіцы.
