Пасяджэнне Савета міністраў Саюзнай дзяржавы адбудзецца ў Маскве 2 лютага. Пра гэта паведаміў прэм’ер-міністр Беларусі Аляксандр Турчын падчас рабочай сустрэчы з дзяржаўным сакратаром СД Сяргеем Глазьевым.
Паводле яго слоў, парадак дня пасяджэння будзе ўключаць 14 пытанняў.
“Праз некалькі дзён, як вы ведаеце, у нас пасяджэнне саюзнага Савета міністраў, у канцы лютага — Вышэйшага дзяржаўнага савета. Таму падводзім вынікі 2025 года, будуем планы на перспектыву. Парадак дня Саюзнага Савета міністраў дастаткова насычаны — 14 пытанняў. Таму ў ходзе нашай сённяшняй сустрэчы хацеў бы з вамі абмяняцца меркаваннямі па падрыхтоўцы да пасяджэння нашых вышэйшых органаў кіравання Саюзнай дзяржавы”, — сказаў ён.
Турчын адзначыў, што на пасяджэнні Савета міністраў у Маскве плануецца разгледзець два ключавыя дакументы: ход выканання асноўных напрамкаў рэалізацыі палажэнняў Дагавора аб стварэнні Саюзнай дзяржавы на 2024–2026 гады, а таксама праект структуры аналагічнага дакумента на 2027–2029 гады.
“У нас традыцыйна рашэннем Вышэйшага дзяржаўнага савета Саюзнай дзяржавы на тры гады зацвярджаюцца асноўныя напрамкі рэалізацыі палажэнняў Дагавора аб стварэнні Саюзнай дзяржавы. Гэта наша дарожная карта на сярэднетэрміновую перспектыву. 2 лютага ў Маскве на пасяджэнні Савета міністраў абмяркоўваем два ключавыя дакументы: ход выканання асноўных напрамкаў на 2024–2026 гады і праект структуры аналагічнага дакумента на 2027–2029-ы”, — праінфармаваў ён.
Паводле слоў беларускага прэм’ера, па напрамках на 2024–2026 гады яшчэ наперадзе значны аб’ём работы — выканана прыкладна палова запланаваных мерапрыемстваў.
“Што датычыцца асноўных напрамкаў на 2024–2026 гады — яшчэ наперадзе, скажам так, значная частка работы па выкананні запланаваных мерапрыемстваў — прыкладна палова. Таму, каб перад прэзідэнтамі адзвітацца, нам, вядома, трэба больш інтэнсіўна падыходзіць да рэалізацыі ўсіх гэтых мерапрыемстваў”, — заявіў ён.
Асобная ўвага, паводле слоў Турчына, будзе нададзена падрыхтоўцы асноўных напрамкаў на 2027–2029 гады.
“Ну і, канешне, да апрацоўкі асноўных напрамкаў на 2027–2029 гады таксама трэба вельмі грунтоўна падысці, закласці рэальныя мерапрыемствы і праекты. На мой погляд, гэта сэрца нашай інтэграцыйнай пляцоўкі, таму, канешне, ад работы Пастаяннага камітэта вельмі многае залежыць, у тым ліку выкананне і прапрацоўка гэтых вельмі важных для нашых краін дакументаў”, — сказаў ён.
Глазьеў заявіў аб «поўнай гатоўнасці» і ўзгодненасці ўсіх пытанняў.
“Што датычыцца справаздачы, то працэс пад кантролем: усе міністэрствы і ведамствы задзейнічаны ў гэтай рабоце. Па асноўных напрамках на будучы перыяд у нас пакуль ёсць толькі прыкладная структура. Самае галоўнае заключаецца ў тым, каб на ўзроўні Савета міністраў даць даручэнне ўсім міністэрствам і ведамствам уключыцца ў працу, каб мы маглі ўжо да сярэдзіны года ўзяць нейкі дакумент за аснову”, — заявіў ён.
“А цяпер там у асноўным эканамічныя пытанні, то-бок, з майго пункту гледжання, трэба было б пашырыць парадак дня і пытаннямі, якія ў нас фактычна ёсць, але там пакуль адсутнічаюць. Гэта і адзіная інфармацыйная прастора, маладзёжная палітыка, увогуле сацыяльная сфера можа быць прадстаўлена больш шырока, а таксама іншыя прававыя пытанні функцыянавання нашага дагавора. Дакумент называецца «Рэалізацыя палажэнняў дагавора». Пакуль у той структуры, якая нам прапанавана, прадстаўлена толькі эканоміка”, — адзначыў ён.
