У памяшканні “Рускага дома ў Брэсце” да 4-й гадавіны поўнамаштабнага ўварвання Расіі ва Украіну праходзіць выстава серыі партрэтаў «Франтавікі. VZгляд» Ірыны Харкаўскай пад назвай «Твары герояў». Наведвальнікі могуць таксама склеіць са стужачак расійскі трыкалор.
“Гэтыя паштоўкі – не проста малюнкі. Гэта пасланні тым, хто стаіць на абароне нашай Радзімы, зафіксаваныя жывыя эмоцыі і неверагодныя, поўныя сілы вочы кожнага байца. Сумна ўсведамляць, што большасць з іх так і не атрымалі свае партрэты”, – гаворыцца ў прэс-рэлізе “Рускага дома ў Брэсце”.
Адзначаецца, што “на малюнках намаляваны байцы сіл спецыяльных аперацый, у якіх схавана большая частка твару”.
Арганізатарамі мерапрыемства выступілі БО РГА “Рускае грамадства” і “Рускі дом у Брэсце”. Ірына Харкаўская з’яўляецца членам РГА «Рускае грамадства». У Брэсце аддзяленне грамадства ўзначальвае Святлана Смірнова.
На ўрачыстае адкрыццё прывялі скрыпічны ансамбль гімназіі, удзельнікаў праекта “Фактар бай”, клуб Рускага грамадства “Арыён”. Прысутнічалі таксама віцэ-консул Генеральнага консульства РФ у Брэсце Раман Цітоў і кіраўніца аддзялення Рассупрацоўніцтва ў Брэсце, віцэ-консул Сафія Пякшэва.
Наведвальнікі павінны былі далучыцца да стварэння палатна са стужачак у колерах расійскага трыкалора. Акцыя называлася “Стужачка”.
