Нацыянальнае кадастравае агенцтва ў рамках работы па ацэнцы нацыянальнага багацця правяло разлік кошту зямель на падставе наяўнай кадастравай ацэнкі.
Як паведамілі ў НКА, кошт зямлі складае 615,376 млрд рублёў. На яе долю прыпадае 37,2% агульнай сумы эканамічных актываў краіны, якую Белстат ацэньвае ў 1,655 трлн рублёў.
У структуры кошту зямель 53% прыпадае на землі сельскагаспадарчага прызначэння, а 33% – на гарады і пасёлкі гарадскога тыпу.
“Можна адзначыць, што з кожным годам кошт зямель павялічваецца прыкладна на 10% за кошт змены цэн на рынку нерухомасці, якая ўлічваецца пры штогадовай актуалізацыі кадастравай вартасці па відах функцыянальнага выкарыстання зямель, за кошт павелічэння гарадскіх зямель і за кошт павышэння эфектыўнасці выкарыстання сельскагаспадарчых зямель”, – дадалі ў агенцтве.
